Daily Newspaper

Ssawiselna avangin CCC atan hmundang zawng turin ti

17

Lawngtlai khawpuia Covid-19 kai hmuhchhuahte enkawlna pui ber atan Thingkah rama 3rd IR Batallion hmunpui tur ruahman mek building pakhat chu hman a ni a. He building-ah hian hri enkawlten fur ruahsur hnuaiah a hul loh avangin thuleng vel a awm a. Social media lamah sawichhiatna an tawh nasat avangin he building satu North East Consultancy Services (NECS) chuan Lawngtlai bawrhsap hnenah hmundang zawng mai tura ngenna an thlen.

Thudawn danin, Lawngtlaia Covid kaite enkawlna, Thingkah rama 3rd IR Bn hmun tur, Community Care Centre (CCC) atana hman hi fur ruahsurah a hul loin CCC enkawltuten harsatna an tawk thin nia sawi a ni a. Hei vang hian a sak hna thawk mektu NECS chuan district bawrhsap Dr Andrew H. Vanlaldika hnenah ziaka thlenin, social media lamah an building sak sawiselna a tam avangte, tui far chu tuiluanna inhnawh thenfai loh vang a nih thute sawiin, social media-a sawichhiat an ni chu na an tih thu an hrilh a. CCC atana hman a nih vanga an hna a hnufum nasatzia hre loa sawisel an hlawh chu pawi an tih thu sawiin, an building saklaite an chhunzawm theih nan CCC dang zawng turin an ngen a ni.

Bawrhsap hian July 16 khan medical lam hotute leh Central YLA hruaitute nen Thingkah CCC hi an tlawh a. A hmunhma enfiahin CCE enkawl hna thawktute leh hri kai enkawlte dinhmun an enfiah. Damlote leh thawktuten harsatna an tawh loh nana ruahmanna siam ngaite leh changtlung zawka CCC kalpui theih dan tur te sawi ho a ni a. CCC sawnna tur erawh ruahman a ni lo tih thu dawn a ni.

Get real time updates directly on you device, subscribe now.

Leave A Reply

Your email address will not be published.

This website uses cookies to improve your experience. We'll assume you're ok with this, but you can opt-out if you wish. Accept Read More

Privacy & Cookies Policy