Daily Newspaper

SSR case: CBI-in thah a nih theihna awm proof an la hmu lo

36

Bollywood actor Sushant Singh Rajput thihna case kal zelah a chhuitu CBI chuan thah (murder) a nih theihna awm finfiahna an la hmu lo va, tunah chuan mahni intihlum a ni theihna lam an hawi ve leh thung tawh niin report a awm.

India Today-in a tarlan danin SSR case buaipuitu zinga officer pathum chuan SSR hi thah a nih theihna awm evidence an la hmu lo niin an sawi a, hei bakah hian CBI team chuan mahni intihlum (suicide) a nih theihna lam hawiin an chhui tan ve leh tawh dawn a, hetih rual hian mahni intihlum duh tur khawpa hual chep leh tihhrehawm a ni em tih lam an te an chhui ve leh dawn a ni.

SSR hi June ni 14 khan Bandra, Mumbai-a a chenna a a mut pindanah inawkhluma hmuh a ni a, a thihnaah hian Mumbai police-te chuan midang kut tuar a nih theihna awm hnuhma an hmuh loh thu an puan hnuah SSR fans leh a chhungte chuan mahni intihlum a nih an ring thei lo a, CBI chhui an ngiat a, SSR pa KK Singh chuan Patna, Bihar-ah SSR ngaihzawng hlui Rhea Chakraborty lakah FIR a theh lut zui a. He case kal zelah hian thu thar a awm zel a, SSR chu tute emaw kut tuara inawkhlum anga lantir ni a sawi te a awm ta zel a, hemi chungchangah hian CBI chuan an chhui zelnaah midang kut tuar a nih theihna awm hi an hmu ta rih lo a ni.

Hetihrual hian CBI chuan SSR hi midangin a nun an tihhrehawm avanga mahni intihlum a ni thei em ti ang zawngin an hnuchhui hi an kalpui ve leh tan tawh dawn a, a hma zawng kha chuan midang kut tuara thi a ni em tih an chhui hmasa phawt a ni.

Case chhuitu CBI team te chuan forensic report leh he case-a mawhphurtu ni a puh te statement an lak khawm atangin SSR kha mi kut tuara thi a nih theihna awm an hmu rih lo a, chutih rualin murder case hi tihtawp erawh a la ni chuang lo. Mahse, CBI hian mahni intihlum a ni em ti ang zawngin an hnuchhui hi an her ve leh hret tawh dawn a ni.

Mumbai Police hnen atanga case an lak hnuah CBI hian Bandra-a SSR chenna in chu June ni 14-a a a ruang an hmuh laia a awm dan angin an rem tha leh a, Rhea leh a unaupa Showik bakah Rhea pa Indrajit Chakraborty te pawh tum nga vel zet thu an zawt fiah tawh a, Chakraborty chhungkua hi a huhovin thu an zawt tawh bawk.

Hetihrual hian Enforcement Directorate pawhin SSR sum leh pai tihchingpen a ni em tih an la chhui ve mek zel a, SSR bank account atanga sum chetvel danah thil rinhlelhawm a awm ti a SSR pa KK Singh-a’n a FIR-a a tarlan avangin ED hian an chhui a, an chhuina lamah Rhea WhatsApp chat atanga ruihhlo lama sumdawng te pawh a kangkai ta zel a, tunah chuan Narcotics Control Bureau (NCB) pawhin he case hi an chhui ve leh tawh bawk a ni.

(THE AIZAWL POST – Thalaite Huang)

The Aizawk Post

Full>> ePaper Subscribe

Get real time updates directly on you device, subscribe now.

Leave A Reply

Your email address will not be published.

This website uses cookies to improve your experience. We'll assume you're ok with this, but you can opt-out if you wish. Accept Read More

Privacy & Cookies Policy