Daily Newspaper

SSR Case: Kangana Ranaut police-in an ko

7

SSR case CBI chhui tir tura ngennain PM beng a thleng

Bollywood actor Sushant Singh Rajput thihna kal zelah Mumbai Police te chuan actress Kangana Ranaut chu he thihna chungchanga sawi tur a neih te sawi tura kohna lehkha an thawn thu an puang a, hetihrual hian he thihna hi CBI-in chhui se tia nawrna kal zelah PM Modi beng a thleng tawh a, Modi pawhin a bengkhawn hle niin an sawi bawk.

SSR hi June ni 14 khan Bandra, Mumbai-a a chenna apartment-ah inawkhluma hmuh a ni a, a thihnaah hian midang kut tuara thi a nih theihna awm hnuhma an hmuh loh thu police te pawhin an puang a, a thihchhanah pawh mahni intihlum tih a ni. Mahse, SSR hi a fans leh thianthate leh a chhungte chuan mahni intihlum duh tur khawpa nekcheptu leh chhaihbuaitu an awm tiin chung mite chu chhui chhuak tuin police lam an ngen ve thung a ni.

Hetiang boruak karah hian Kangana Ranaut hian TV interview-ah SSR thihnaah hian Bollywood producer lian te a dem a, Bollywood-ah chuan ‘Suicide Gang’ an awm tiin, chung mite chuan an mi duh loh zawng leh anmahni kalh deuh zawnga awm te chu nekchepin, mahni intihlum duh tur khawpin an nun an tihrehawm thei a ni, a ti a, chuvangin he thihna thubuaiah hian Bollywood producer lian ber ber pali vel lai mai chu police ten thu zawhfiah atan ko se a tih thu te a lo puang tawh a ni. A statement pawh an duh a nih chuan pek a inpeih reng thu Kangana hian a puang nghal bawk a ni.

Kangana hi amah Manali lamah a awm lai a ni a, Mumbai Police-te chuan sawi duh a neih te sawi ve turin an koh thu leh an kohna pawh hi Manali-ah an thawn tawh thu an puang a ni. He case-ah hian Mumbai Police ten mi 38 chuang thu an zawtfiah tawh a, chung zingah SSR chhungkhat laina leh thiantha te pawh an tel a, chung zingah chuan a ngaihzawng Rhea Chakraborty pawh a tel a ni.

Hetiang karah hian politician leh ukil hriathlawh tak Subramanian Swamy chuan Prime Minister Narendra Modi hnenah lehkha thawnin, SSR thihna hi CBI chhui turin a ngen a, Delhi a ukil Ishkaran Singh Bhandari chuan Swamy lehkha hi PM-in a hriatpui tawh thu a puang ve bawk a ni.

Subramanian Swamy chuan SSR thihna hi CBI chhui tir tura duhtu zawng zawng tan Twitter-ah tweet-in, “SSR thihna hi CBI chhui tir ngei ni se ti zawng zawng chuan an constuency MP hnenah lehkha thawnin, ka tih ang hian PM hnenah CBI chhui tir turin ngen ve rawh se,” a ti.

Get real time updates directly on you device, subscribe now.

Leave A Reply

Your email address will not be published.

This website uses cookies to improve your experience. We'll assume you're ok with this, but you can opt-out if you wish. Accept Read More

Privacy & Cookies Policy