Daily Newspaper

SSR case: NCB hmaah Rhea a inlan leh

7

Bollywood actor Sushant Singh Rajput tihna case kal zelah Pathianni kalta a thu an zawh fiah hnuah nimin khan Rhea Chakraborty chu Narcotic Control Bureau hmaah a inlan leh ta a, hetihrual hian NCB-in Rhea unaupa Showik Chakraborty chu an man tawh a, ani bakah hian SSR house manager Smuel Miranda leh SSR tirhkah Dipesh Swant te chu an lo man tawh bawk. Rhea hi a hmain CBI leh Enforcement Directorate pawhin thu an lo zawt fiah tawh bawk a ni.

Rhea hi NCB hian a WhatsApp chat-a ruihhlo chungchang an hai chhuah thu kal zelah a nih hnihna atan an dâwp leh dawn a, hetihrual hian a unapa Showik chu medical examination ti turin NCB hian an hruai chhuak ve thung a, Showik bakah Zaid Vilatra leh Samuel Miranda te pawh medical examination tura hruai an ni bawk.

Showik leh Miranda te hi Narcotic Drugs and Psychotropic Substrances (NDPS) Act tlawhchhana man an ni a, Zaid Vilatra leh Abdel Basit Parihar te pawh SSR thihna case kal zela ruihhlo lama inhnamhnawihna nei a ngaih an nih avangin man an ni bawk.

Maharastra State Human Rights Commission pawhin SSR case-ah hian Rhea Chakraborty-i’n SSR thih hnua a ruang dahna Cooper Hospital-a an ruang dahnaah kal a, SSR ruang a en theih dan chu ziak a sawi fiah turin Cooper Hospital leh Mumbai Police te chu a hriattir ve leh tawh bawk. Danah chuan ruang dahna ruang chu an thisen zawmpui te ni lo tan en a rem lo a, chutiang a ni chunga Rhea-i’n SSR ruang a en theih dan hi sawi fiah turin an ti a ni.

A hma pawhin SHRC hian Cooper Hospital leh Mumbai Police te hi insawifiah turin a lo ti tawh a, mahse, Mumbai Police chuan thuchhuah siamin he case buaipuitu officer chu COVID-19 test a positive avangin report a theh lut thei lo niin an lo sawi tawh a, Cooper Hospital team pawhin National Health Systems Resource Centre (NHSRC) chu an ukil ho a tlawhin, Rhea hi ruang dahna kal phalna an pe lo niin an lo sawi tawh bawk a ni.

Rhea hian TV interview-ah SSR ruang hi damdawi inah a en thu a lo sawi tawh a, a ruang chungah zahna a lantir duh vanga kal niin a insawi a, hetiang a ruang dahnaa a kal duhna chhan hi June ni 15-a SSR vuinnaah a tel ve an phal sak loh vang niin a sawi ve thung.

He thil thleng hi SSR chhungte ukil Vikas Singh chuan rinhlelhawm a tih thu sawiin, “Ruang dahnaa Rhea a kal hi rinhlelhawm tak a ni, a chhan chu Sushant Singh a thih khan engmah inzawmna an nei tawh lo. Chuvangin, eng vanga Sushant ruang kha hmuh phalsak nge an nih. Ka rindan chuan a ruk deuh a hruai luh a ni ang. A hmelah lungchhe hmel a pu lo va, a mittui pawh a tla lo a, a tap hek lo a, he thihnaa mawhphurtuah a inpawm a, inchhirna a nei lo tih a lang a ni. Sushant hi lainatna pakhatmah a nei lo a ni,” a ti.

(THE AIZAWL POST – Thalaite Huang)

The Aizawk Post

Full>> ePaper Subscribe

Get real time updates directly on you device, subscribe now.

Leave A Reply

Your email address will not be published.

This website uses cookies to improve your experience. We'll assume you're ok with this, but you can opt-out if you wish. Accept Read More

Privacy & Cookies Policy