Daily Newspaper

SSR case: Rhea bail an la dil leh lo

20

June ni 14-a Bandra, Mumbai-a a chenna apartment-a inawkhluma an hmuh Bollywood actor Sushant Singh Rajput thihna case kal zelah SSR ngaihzawng hlui leh he thihnaa mawhphurtu bera puh Rhea Chakraborty chu Narcotic Control Bureau (NCB) chuan kar kalta Thawhlehni khan manin, Byculla jail-ah tan tir a ni a, Rhea ukil, Satish Manshinde chuan special court leh seassion court-in bail an dilna an hnawl tawh hnuah High Court-ah kal an tum thu a lo sawi tawh chu, “Bail dil hi kan hmanhmawh lo,” tiin High Court-ah hian an la kal loh thu a sawi.

Satish Manshinde chuan, “|hiante u, court atangin copy vawiinah hmu pawh ni la, chet vut vut kan tum lo. Court order kan zir chiang ang a, NCB chet dan en chungin thu tlukna kan siam ang. Engmah thup kan tum lo. Kan tih hunah chuan, Bail Dilna copy kan tichhuak ang,” a ti.

Hetihrual hian NCB chuan Rhea hian ruihhlo a inhnamhnawih Bollywood star te hming a puan zingah SSR ngaihzawng hlui tho Sara Ali Khan leh Rakul Preet Singh te hming pawh a puang tel niin NCB deputy director KPS Malhotra chuan a sawi a, anni pawh hi an koh ve thuai tur thu a sawi.

Hetiang boruak karah hian Rhea hian ruihhlo chalai kual vel nana midang biak kual nan a nu phone a hmang thin niawmin sawi a awm a, hei hi NCB chuan engmah an hriat loh thu sawiin, KPS Malhotra chuan, “Journalist thenkhatin Rhea hian ruihhlo chalai kual vel nan a nu phone a hmang thin em ni tih zawhna an nei a. Hei hi kan finfiah lo va, kan chhuinaah pawh a tel lo,” a ti.

Rhea hi NCB-in an man hlimah a ukil chuan bail dil nghalin, Rhea kut atangin ruihhlo engmah man an neih loh avang leh, an puhna chu Ganja tlem chungchang mai a nih avangin bail theih tur a ni, a ti a. Mahse, session court chuan Rhea hi ruihhlo tawlh ruk a inhnamhnawih a puh a nih bakah SSR tan ruihhlo leina tur sum chalai-tu a nih bawk avangin NDPS (Narcotic Drugs and Psychotropic Substances) Act, section 27-A hmanga hrem theih a ni tiin, chu chu bail theih loh a ni, a ti ve thung. He dan hnuaiah hian ruihhlo an kutah man tel kher a ngai lo niin court chuan a tarlang bawk. He dan hnuaia thiam loh chantir te chu kum 10-20 thleng lung in tang tura hrem theih an nih bakah Rs 2,00,000 chawi tir theih an ni bawk.

(THE AIZAWL POST – Thalaite Huang)

The Aizawk Post

Full>> ePaper Subscribe

Get real time updates directly on you device, subscribe now.

Leave A Reply

Your email address will not be published.

This website uses cookies to improve your experience. We'll assume you're ok with this, but you can opt-out if you wish. Accept Read More

Privacy & Cookies Policy