Daily Newspaper

SSR Case: SSR bialnu Rhea lakah SSR pa-in FIR a thehlut

42

Bollywood star Sushant Singh Rajput thihna chuan nghawng a la nei zel a, he thihna an chhuinaah rin loh lamah thli a thleh leh thut a, Sushant-a pa KK Singh chuan a fapa bialnu thihsan tak actress Rhea Chakraborty lakah FIR a thehlut ve leh tlat mai. KK Singh hian Rhea bakah mithenkhat lakah FIR hi theh luthin IPC Section 340, 341, 380, 406, 420 leh 306 tlawhchhanin FIR hi a theh lut a ni.

KK Singh chuan a FIR phek sarih-a chhah chu Bihar Police-ah a theh lut a, chutah chuan Rhea chu ‘bumtu,’ ‘suahsual rawng bawla inrintawnna tichhia,’ leh thildang bakah ‘mahni intihlum tura midang fuihtu’-ah te a puh a ni.

Sushant Singh Rajput hi June ni 14 khan Bandra, Mumbai-a a chenna apartment-ah inawkhluma hmuh a ni a, Mumbai Police te chuan he thihnaah hian midang kut tuara thi a nih theihna awm an hmu loh thu leh mahni intihlum ngei a nih thu an puan hnuah pawh fans leh a chhungte lam an lungawi thei lo va, mahni intihlum duh hial tur khawpa nawr luitu leh hual cheptu an awm tiin a case chu CBI chhui hial an phut a ni.

Hetiang boruak-ah hian Mumbai Police-te pawhin mi hrang hrang thu an zawtfiah tawh a, chung zingah chuan SSR ngaihzawng Rhea Chakraborty pawh a tel a, ani bakah hian Hollywood producer Aditya Chopra, Sanjay Leela Bhansali, Mahesh Bhatt leh midang te pawh an tel a ni.

Mumbai Police te chuan SSR chhungte an kawm tawh zawng zawng pawhin Rhea hi an rinhlelh awm tuman an sawi lang lo niin an sawi a, mahse tun hnaiah Rhea lakah rinhlelhna neiin, Rhea bank account-ah tun hnaiah sum thahnem tham tak transfer a awm niin sawi te a awm a, chutiang karah chuan boruak dang lo awm nen Rhea hi SSR mahni intihlum tura nawr luitute zingah a tel anga ngaiin, a lakah FIR hi KK Singh hian a theh lut ta a ni.

Mumbai Police-te chuan Sushant-a’n company a din pathum te chu an chhui zui niin sawi a awm a, chung company zingah chuan a thenkhat chu company intawm anga ziah luh a ni a, a intawm puite chu Rhea Chakborty leh a unaupa Showik Chakraborty te an ni a, Showik hi director angin a awm a, company thar, company intawm anga an ziah luh ni siah Sushant chiah a pawisa thawhtu a nihna te a awm niin an sawi bawk.

Sushant Singh Rajput hi Bihar khawchhuak a ni a, a chhungte pawh Bihar-a awm an ni a, hei vang hian a pa KK Singh pawhin Bihar Police-ah FIR hi a theh lut a, Bihar Police te hian Mumbai-a SSR chenna in pawh an endik dawn a, Mumbai Police hotu te pawh an kawm dawn niin report a awm bawk a ni.

Get real time updates directly on you device, subscribe now.

Leave A Reply

Your email address will not be published.

This website uses cookies to improve your experience. We'll assume you're ok with this, but you can opt-out if you wish. Accept Read More

Privacy & Cookies Policy