Assembly Session-a Sialkal Range Development Council Bill sawihonaah member thenkhat thusawi duh danah tharum thawh tura Paite hnam fuihpawrh tumna chu zia lo an tih thu Paite zirlai pawl – Siamsinpawlpi chuan sawiin, tharum thawh chu tha an ti lo tih an sawi.
Siamsinpawlpi – SSSP (Paite Students Welfare Association) Hqrs Aizawl thuchhuak chuan, 9th Mizoram Legislative Assembly-a Sialkal Range Development Council (SRDC) Bill sawihonaah opposition member-te duhdan anga ngaih theiha thutlukna a awm ta hlauh leh, chumi atana hmalakna a awm hi an nihna ai maha Paite hnam dahsanna leh huphurhna vang nia an hriat thu a sawi.
SRDC chu Paite hnam bil ta ni lo, Paite hmalaknaa din a ni lo tih sawiin, sawrkarin Sialkaltlanga cheng, khawsak kawnga hnufual zawkten hmasawnna kawnga midang ruala ke an pen ve theihna atana a din a ni a, a huamchhunga chengte Paite an ni mai zawk tih a sawi.
Legislative Assembly member thenkhatin, thisen chhuak leh nunna chan em pawh awm loa SRDC Act neih chu awm leh dik loa hria in he bill hi an hnial tih SSSP hian sawiin, ‘Kan hriatthiam dan chuan, SRDC Bill hi council thar siamna tur ni loin, sawrkar notification awm mek act-a thlakna tur a ni. Hemi thlakna atana thisen leh nunna hlan ngai tura ngaih hi pawi kan ti a; chu ai mah chuan tharum nena che a, Mizoram tibuai tura fuihpawrhna atana rorelna in sang hman a ni hi a pawi mai ni loin a zia lo hle. Dan leh thupek tihbuai tuma Legislative Assembly hman bawrhban tumna pawh a ang deuhin kan hria a. Paite hi chuan tharum thawhna hi engtik lai mahin tha kan ti ngai lo,’ a ti.
Mizoramah Mizo hnam hrang hrangin mahni puala inrelbawlna neih theih nia ngaiin, 1947- 1948 khan Paite Federation chuan regional council a lo dil tawh a, 1964-ah Paite National Council (PNC) in a dil ve leh a, khatih laia Mizo District deputy commissioner K Saigal pawhin a huam chin tur enin Sialkal tlangdung a tlawh nghe nghe tih a sawi.
MNF movement-in a nangching a, Paite tam takin he movement hi an zawm a. Chutih laiin, PNC hruaitu thenkhat thah an ni a, a then chu man an nih hnuah Mizoramah awm ngam loin an tlanchhia a, Regional Council dilna pawh a zuzi ta tih a sawi a ni.
Mizoram buai a reh a, hnam bil inrelbawlna neih ve duhna boruak a thar ve leh a, Paite zingah Hmar People Convention (HPC) movement kut tuar an lo awm tan bawk avangin PNC chu thar thawh leh a ni tuih SSSP hian a sawi.
‘Sixth Schedule hnuaia Autonomous District Council ngen a ni a. SRDC hi Paite ta bil ni hran lo mah se, Paite-in autonomy nei tura hma la lo emaw tawrh pawh tuar miah lo anga ngaih chu a dik lo. Kan hruaitu hmasaten nunna an chan bakah man, vau, sawisak, sum leh pai chhuh luihsak an tuar a. Hetiang hi lo tuar lo pawh ni se, tharum thawhna phut leh beisei ang hrima Legislative Assembly meuha sawi a ni hi Paite zirlaite chuan a tha lo kan tiin Mizoram ralmuanna tihderthawnin awm lo se kan ti hle a ni,’ thuchhuah chuan a ti.
SSSP-in Paite fuihpawrh tumah MLA thenkhat ngai
