Daily Newspaper

SSU Award 2020 an sem ta

14

Students’ Self-Support Union (SSU) buatsaih Self-Support Award 2020 chu December ni 15 zan dar 8 khan Ignite Studio, Khatla-ah sem a ni a, Lalchhandama Ralte, School Education Minister-in award hi a sem a ni. He Award hian lawmman Rs. 10,000, citation, lehkhabu chi hrang hrang pariat leh pen drive te a keng tel a ni.

SSU hian “Self-Support Award” hi kumtin an sem thin a, kum 30 vel chu an lo sem tawh a ni. Self-Support Award hi University, College leh Higher Secondary School hrang hrang atangin principal, zirtirtute leh zirlai hruaitute’n format siamsa hmangin dawn phu ni a an hriatte an recommend a, an chanchin tawi an rawn thil tel bawk. Recommendation eng emaw zat lutte chu uluk taka endik a ni a, chuta tang chuan award dawng tur mi pathum thlan chhuah an ni ta a ni.

SSU Awards 2020 hi Malsawmhlui, Lalrinawma leh VL Malsawmtluanga ten an dawng a ni.


“Self-Support Awardee 2020” Chanchin

Malsawmhlui:
Malsawmhlui hi Lalringzuala leh Lalramsangi te fa upa ber niin November ni 18, 1996 khan Aizawl Civil Hopital-ah a piang a, eizawnna lamah chuan a pa hi PWD-a thawk a ni a, zirna lamah chuan Kids Care School, Ramhlun South-ah Pawl 8 & 9 a zir a. Kum 2014 khan Ramhlun South High School atangin Class X a pass a, Govt. Mizo Higher Secondary School atangin Class XII a zo leh bawk. Class XII a pass hnu hian Stenography zirin ITI-ah a training leh a. Stenography zir zovin tunah hian Govt. Hrangbana College-ah 5th Semester B.Com. (Morning Shift) a zir mek a ni.

Pawl riat a nih lai atangin pen, pencil leh zirlaibu man thenkhatte mahnia a lo intum ve theih nan tiin an thenawm hnaivai-ah te insu leh nauawm te-in a inhlawh thin. An thenawmah tuikhur a awm thin a, tui thal te’n a inhlawh bawk thin. Class X – XII a zirlaiin holiday-ah mi inah hna a thawk a, exam chawlhah dawr thawhna remchang a hmuh ang angah a thawk thin bawk a ni. Stenography a zir laiin Class banah inah haw lo-in, zan lamah eichawp dawrah dar 10 thleng hna a thawk thin. 2018 kumtir khan Mizo Hnam Runah Computer Operator hna a hmu a, chu chu tun thlengin a thawk ta a ni.

Hna thawk chung hian zingkarah B.Com. class a kal a, mahse vawk an vulh bawk si nen, zing thawh hma leh zual a lo ngai a, zing dar 6-ah class an tan avangin vawkchaw khawn turin zing dar 2-3 velah te a tho a, zing dar 9-ah class an bang a, class ban veleh chawhma dar 10/11 vel thleng Computer Class a kal a, chumi hnu-ah full time-a a thawhna Mizo Hnam Run-ah a kal leh thin.

A sawi hmaih phal loh chu a thawhna Mizo Hnam Run lam hian a dinhmun an hrethiam em em a, a zirlai an ngaihpawimawh sak em em bawk a, engmah sawi nawi an nei ngai lo a, a lawm em em a ni.

Unau zinga upa ber leh chhungkaw rinrawl ber chu inchhungah mawhphurhna a ngah hle mai a, inchhungah chet a lo ngai a, zan dar 11 hnu lamah hian in a tifai hman chauh thin. Pickle zawrh bakah rawng hnawih te, chawhmeh leh thil dang zuar te-in a inhlawh thin bawk.

Sawmi hi Aizawl-a piang leh seilian a ni a, a pa sorkar hnathawk a lo ni bawk nen, chhungkaw harsa an ni hran lo. Chumi avang chuan hetia lehkha zir paha a rem rem thawka a inhlawh lawp lawp pawh hi a chhungte’n an pawmpui loh chang a awm fo. Khawtlang leh Kohhran-ah a theih ang tawka inhmangin The Salvation Army, Ramhlun CO Bial SAY-ah finance Secretary a ni mek a ni.

Lalrinawma:
Lalrinawma hi Thangchungnunga (L) leh Vanneihi te fa naupang ber niin, October ni 18, 1996 khan Ngopa khua-ah a piang a, eizawnna lamah chuan a pa hi PWD-ah MR a ni a, a pa thih hnu hian a nu hian a pa ai a awh ve leh a ni. Zirna lamah Class XII thleng hi Ngopa-ah a zir a. BA chu Govt. Hrangbana College atanga zovin core subject-ah History a la a, 1st Division-ah a pass a ni. Tun-ah hian Mizoram University-ah 3rd Semester MA (History & Ethnography) a zir mek.

Mahni intodelh nan hian cement work te, arte (broiler) an khua Ngopa lama thawn te, plumbing leh rawnghnawih te a thawk thin a ni. Mahni intodelhna kawngah hian harsatna tawk lutukin a inhre lo a, a zirna lamah nasa takin a pui zawkah a ngai. Rinawma hi Pawl 12 a pass hnuah 2016 khan Ngopa atangin Aizawl-ah college a kal a, mahse, hemi kum hian vanduaithlak takin chhungkaw eizawngtu ber a pa a boral hlauh mai a. A zir zawm duh chuan amaha a inenkawl a lo ngai ta a ni.

A bultan nan Mission Vengthlang Hall sakna-ah inhlawhin, chu chu mahni intodelh tura a bultanna a lo ni ta a ni. Rinawm tak leh taima taka a thawh avangin Misson Vengthlang Hall sak hna enkawltu ber pawhin a duhsak em em a, tun thleng hian hnathawh tur a dilin a lo hnar ngai lo va, an bula a thawh tawh loh hnu pawhin zan lam hna awm reng rengah chuan duhsak takin Rinawma hi an la sawm thin. Tunah chuan ama mamawh bakah chhungte pawisa thawn thei khawpin a intodelh chho ta a ni.

Kum 2017 tawp lamah Cancer natna avangin a nu zai a lo ngai a, Aizawl-ah a la thla a, a nutei te puihna nen a sum thawhchhuah atangin a a nu chu dam tha valin an enkawl a ni. A nu an enkawl lai hi BA a zir lai a ni a, inhlawh a lo ngai nen, a nu buaipui a ngai bawk nen, kar khat leh ni thum chauh class a kal a, attendance-ah a tla chiang hle. Mahse an principal puihna-in internal mark nei hauh lo-in a exam a, First Division-ah BA a pass a ni. Hemi hnu hian class kal tibuai lo-in zingkarah an khua, Ngopa lama arnote thawn hna a thawk leh ta ngat ngat a. Zing dar 3-ah chuan an awmna atanga veng hla tak takah a awm hman tawh thin. Hemi hnu hian rawnghnawih leh plumbing lam-ah mistiri a ni leh a, Inrinni leh holiday leh zing leh zanah te a thawk thin a ni.

VL Malsawmtluanga:
VL Malsawmtluanga hi July ni 18, 2002 khan a piang a, Vanlalvena (L) leh Zarzolianite fa pathum zinga upaber niin, eizawnnaah chuan an chhungkua hi huan nei an ni a, a pa hian driver hna a thawk bawk. Zirna lamah chuan high school thleng an khua, Tachhip-ah a zir a. Class X a pass hnuah a nautenen Bethlehem Vengthlang, Aizawl-ah in luahin Govt. JL Higher Secondary School-ah Class XI leh XII a zo a. Tunah hian Govt. Johnson College-ah 3rd Semester BA a zirmek ani.

Mala hi a pa-in November ni 14, 2018 khan a boralsan a, amah chauh nilovin an chhungkua a ngaihtuah tel a lo ngai ta a. A school ban veleh hnathawk turin a liam nghal thin. Fu huan nei an ni a, exam chawlh laiin an khuaah hawin fu huan thloin ram a riak lut nghal vat thin. College a kalhnu-ah pawh a inhlawh chhunzawm zel a. Intodelh nan cement work thawhte; brick, balu leh rora thiar te, driver hnate a thawk thin bawk. Tichuan, theihtawpa a rem rem thawka a inhlawh thinna atangin an chhungkualeh a naute a chawmthei a ni.

Dammawh-hritlan tawh chang pawh a hnathawh hram hram a ngai thin chu hrehawm a tih ve deuh thu a sawi a, hei bakah hian an inhlawhnate’n hlawhpek that loh chang an neih te hian school / college fee pek a lo hun bawk chuan hrehawm a ti thei hle. Chaw kawpuara ei hman lo khawpa hnathawh chang pawh a nei fo a ni. Chhungte leh naute enkawl tel pah a nih avangin a thawh chhuah chhun a ren em em a, thawmhnaw pawh a haklai a la that chuan a thar a lei mai mai ngai lo a, thawmhnaw ngai ngar ngar ha-a class a kal changa miin an nuih deuh te hian hrehawm a ti ve thin hle.

Khawtlangah leh kohhran-ah a theih ang tawk tawk a inhmangin an College Students’ Evangelical Union-ah Asst. Secretary a n imek a. Zirlaititha Chawimawina, YMA lehKohhran atangin a lo dawng nual tawh bawk a ni.

Read More>> Full>> Epaper Subscribe Now

Get real time updates directly on you device, subscribe now.

Leave A Reply

Your email address will not be published.

This website uses cookies to improve your experience. We'll assume you're ok with this, but you can opt-out if you wish. Accept Read More

Privacy & Cookies Policy