St. Paul’s Higher Secondary School chuan kumin HSLC leh HSSLC exam-a an zirlai tithate lawmpuina leh chawimawina Thawhlehni khan hmangin ‘Paulians’ Proficiency Award 2024’ an hlan.
Hmanpuitu School Education minister Dr Vanlalthlana chuan a ni pawh he school atanga zirchhuak ve tho a ni tih sawiin, a zir chhungin zirlai piahlamah nunphung dik leh tha nei tura zirtirna tha tak tak a dawn thinte chuan a vawiin hun a siam chho a, tun thlengin St. Paul’s HSS chuan zirlai tha leh mi chhuanawm tak tak a chherchhuah zel avangin lawmawm a tih thu a sawi a ni.
Zirlai tithate chuan an taimakna leh tumruhna rah tha an hmu a ni, tiin, hei hi an bul tanna tur chauh a nih avangin an hmalam hun atan theihtawp chhuah zel turin a fuih.
Paulians’ Proficiency Award 2024 hun hmanah hian zirlai tithate aiawhin HSSLC (Science) 2024 topper Lalramdina Ralte leh Paulians Alumni Association president Dr Franklin Lalrinngheta ten thu an sawi a. St. Paul’s HSS zirlaiten an thiamthil chi hrang hrang – zai leh lam bakah instrumental music hmangin kalkhawmte tan hun an hmang a ni.
St Paul’s HSS-in zirlai chawimawi
