Science Teachers Association Mizoram (STAM) chuan August 9 khan an din champha vawk 38-na chu Aizawlah an lawm.
Din champha hi STAM patron, School Education minister Dr Vanlalthlana’n a hmanpui a. Zirlai harsate tanpuina atan STAM Educational Foundation din a ni chu tha a tih thu sawiin, hemi pual hian Rs. 5000 a thawh a. A MLA Fund atangin science zir duh, sum lama harsa zirlai pahnih tan college admission senso a pek tur thu sawiin, STAM chu implementing agency-ah a tang anga, hemi hmang tangkai tur hi thlan a ni dawn tih a sawi a ni.
School hrang hrangah Atal Tinkering Laboratory din belh zel a nih theihnan hma lak mek a ni tih a sawi a. STAM hruaitute chuan ATL chu zirlaite science zirna atan a that em avangin a tam thei ang ber din belh se an duh hle tih an hrilh nghal a ni.
Minister chuan central university din a nih theihnana STAM hma lakna ropui a tih thu a sawi a. NIT Mizoram campus, Lengpuia dinna tura thil tihfel ngai la awmte bawhzui zel a ni tih a sawi a. Pukpui Lungleia Engineering College tihpuitlin a nih theihnan central lama a thlen tawh dan sawiin, umzui zel a nih tur thu a sawi.
Science leh mathematics zirtirtu kan la indaih tawk lo hle tih sawiin, school tinah science leh mathematics zirtirtu data an neih fel thu leh hei hian zirtirtu siamrem kawngah nasa takin a pui dawn tih Dr Vanlalthlana hian a sawi a ni.
STAM founder president Dr H Lalthlangliana chuan STAM din chhan leh thil tum, science leh mathematics zirna in hma a sawn zel theihnan ngaihtuahna, tha leh zung an lo sen tawh dan a sawi a. Mizoramah central iniversity din a nih theihnana an pawlin hma an lo lak tawh dan a sawu bawk.
STAM din champha lawmnaah hian proficiency award donor-te, advisers, science NGO bakah environment humhalh lama an thawhpui MEFCOF leh zirlai pawl atangin MZP leh MSU te an sawm a ni.
STAM-in an din champha lawm
