Kum 2023 Madhya Pradesh Assembly election chu Novermber 17 ah thawhkhata neih zawh tur niin Rajasthan-ah November 23 ah neih a ni ang a, Telangana-ah November 30 ah neih a ni bawk ang a. Mizoram chu inthlang hmasa ber tur niin November 7 ah inthlanna neih a ni ang.
Chhattisgarh chu kumin inthlang tura thawh hnihna inthlan hmachhawn tur awm chhung niin Mizoram rualin November 7 ah leh Madhya Pradesh rualin November 17 ah te an inthlang thung dawn a ni.
Heng state inthlan te hi a rualin December 3 ah result puanna neih a ni ang.
He inthlanah hian mipui 16.1 cr vel te chuan vote thlakna nei dawnin kum 2024 Lok Sabha inthlanna neih tur atana ‘semi-finals’ anga ngaih a ni.
Kum 2018 inthlana thil thleng?
Congress te chuan kum 2018 inthlanah khan Chhattisgarh, Rajasthan leh Madhya Pradesh inthlanah te chakna an chang a. Mahse, Madhya Pradesh-ah ber hian an leader pakhat Jyotiraditya Scindia leh lawmaker thenkhatte chuan chhuahsanin BJP zawmdanin Kamal Nath sorkar chu a tluk phah ta a ni.
Chhattisgarh-ah chuan Congress ten seat 68 la in BJP ten seat 15 chauh an la thung a, Congress te vote share chu 43 per cent lai a ni a. Assembly hian seat 90 neiin majority mark chu 46 a ni.
Madhya Pradesh-ah chuan BJP leh Congress te chu inbeitawn hlein saffron party ten seat 109 an lak laiin Congress ten seat 114 an la thung a. He state hian Assembly seat 230 neiin majority mark chu 166 a ni thung a.
Rajasthan-ah Assembly seat 200 awmah majority mark 101 a ni a, Congress ten 100 la in BJP ten 73 inthlan hnuhnung ber khan an la thung a. Congress te chuan sorkar siamin Ashok Gehlot chu Chief Minister a ni zui a, seat ruk latu Bahujan Samaj Party ten an thlawp a ni.
Telangana chu chhim lam state inthlang tur awm chhun niin seat 199 awmna a ni a. Majority mark chu seat 60 a ni thung a. Kum 2018 inthlanah khan Chief Minister K Chandrashekhar Rao’s Bharat Rashtra Samithi chuan hneh takin chakna changin seat 88 an la a. Congress te chu pahnihna niin seat 19 an la a, Asauddin Owaisi party AIMIM chu pathumna niin seat sarih an la thung a. BJP te chuan seat khat chauh an la thung.
Kum 2018 inthlanah khan Mizo National Front te chuan seat 40 awmah seat 27 lain sorkar an siam a. Congress te chuan seat li chauh la in BJP ten seat khat an la ve thung a. A bak chu independent candidate ten an chang a, Mizoram-ah hian majority mark chu seat 21 a ni thung.
Chhattisgarh, Madhya Pradesh, Rajasthan leh Telangana assembly hi nakum January thlaa tawp tur a nih laiin Mizoram chu December 17 a tawp tur a ni thung.