Daily Newspaper

State parukin GST chungchangah lungawi lovin Centre khing

32

State parukte chuan Thawhtannia Centre-in Covid-19 leng avanga harsatna tawka GST compensation pek tur pek theih loh khuh nana loan la tura a tihna chu an hnawl.

Telangana, West Bengal, Kerala, Chhattisgarh, Delhi leh Punjab sorkar Finance Minister-te chuan video conference neiin lungrual takin GST compensation an dawn tur chu Centre-in loan lain a pe tur a ni an ti.

Heng sorkarte hian tun hnaia GST Coucil meeting neihnaah Centre in GST compensation Centre in a pek tur Rs 2.35 lakh crore vel pek theih si loh phuhruk nana Rs 97,000 crore loan la tura a tihna pawh an hnawl bawk.

Meeting neih zawh hnua press conference a neihnaah Telangana Finance Minister T. Harish Rao chuan Centre chuan State te hnenah compensation Rs 2.35 lakh crore a pek tur atangin Rs 1.67 lakh crore chauh a pe a, Rs. 65,000 crore chu cess levy atangin a pe bawk a ti a.

GST Act in a sawi chiang hle a, State growth rate level in 14% a phak loh chuan compensation pek tura tih a ni a. ‘Act of God and coronavirus’ hmingin Centre chuan Rs 1.35 lakh crore a pek tur a pe duh lo a ni. Compensation hi natural calamity a ni emaw Covid a ni emaw hnial theih a ni lo va, he ngaihdan hi Attorney General of India ngaihdan pawh a ni, tiin a sawi.

Harish Rao chuan Centre chuan compensation chu a puma a pek ngei ngei a ngai a, duhthlan tur dang a nei lo a ti bawk a. Centre chuan cess distribution surplus chu Consolidated Fund of India ah tun hnai kum thum chhunga GST kalpui atangin a dah a, Mahse tunah chuan State sorkarte chu an hloh te pawm turin a ti leh thung a. Cess levy hmanga revenue awmte chu State-te chan tur zawk a ni tiin a sawi bawk.

“Telangana sorkar chuan heng double standard hi engti kawng mahin a pawm dawn lo” tiin a sawi bawk a. Pandemic avangin Telangana chuan revenue 34% Rs 8,000 crore lai thla li chhungin a hloh tawh a ni a ti bawk a. State-in national exchequer-ah Rs 18,032 crore a chhunluh laiin Rs 3,200 crore chauh a hmu let a ni, a ti bawk.

Harish Rao chuan GST kalpui a nih tan lai khan Telangana chuan zawm a hreh hle thu sawiin, kum 2016-17 khan State growth rate chu 22% a ni a, chu chu a tehna siam aia 8% a sang zawk a ni. Lo zawm ta ila chuan State chu tunah chuan Rs 25,000 crore in a hausa tawh zawk ang a ti bawk a. GST a zawm chhan chu ram pum huap thil a nih vang leh tax liberalisation awma investment a awm theih nana ti an nih thu a sawi bawk. Telangana chuan UPA sorkar hunah pawh khan GST chu a duh lo va, khatih lai khan UPA chuan State-in Central Sales Tax a share chu Rs 3,647 crore in a titlem a ni a ti bawk.

NDA sorkarin State tithate hnenah cess fund a tlem a nih pawhin pek tam tur a ti a. Sorkar pahnihte hian Telangana dikna leh chanvo an namnul ve ve a ni, a ti bawk.

Centre chuan a duh ang thalin resource neih nan borrowing limit, cess leh tax revenue a tisang a, mahse State-te chu puk tur leh cess tlem zawk a pe bawk si a ni. Hei hi pawm theih loh a ni a, hei vang hian State parukte chuan dan hmangin a khing let dawn a ni, tiin a sawi bawk.

(THE AIZAWL POST – Ramchhung)

The Aizawk Post

Full>> ePaper Subscribe

Get real time updates directly on you device, subscribe now.

Leave A Reply

Your email address will not be published.

This website uses cookies to improve your experience. We'll assume you're ok with this, but you can opt-out if you wish. Accept Read More

Privacy & Cookies Policy