Uttar Pradesh chu Lok Sabha seat tamna ber niin kumin inthlanah Congress leh Mayawati party te tana pawimawh tak ni thei a ni a. Akhilesh Yadav kaihhruai Samajwadi Party tan pawh pawimawh lutuk a ni bawk.
Delhi luahtu ni tur chuan Uttar Pradesh a pawimawh lawr lak a, kum 2014 atang khan BJP te chuan UP an luahlum char char tawh a ni. Kum 2014 hnua inthlan awm reng rengah Lok Sabha ni emaw Assembly a ni emaw BJP ten chak takin thuneihna an chang zui vek a.
Kumin Lok Sabha inthlanah pawh BJP supporter te chuan Ayodhya a Ram Temple saka hawn a nih zuina chuan BJP te chu nasa takin a chak tir leh an beisei a ni.
BJP tena Uttar Pradesh-a nasa zawka an insawhngheh theih nana pawimawh taka ngaih bawk chu Prime Minister Narendra Modi an Varanasi constituency a thlang chu a ni bawk.
Varanasi chu khawpui pawimawh a ni a, khawpui history mai a ni lo, a cultural landscape te, Hindu hmun thianghlim leh pawimawh a nihna te chuan dinhmun pawimawh tak a luah tlat a ni.
“Kum 2014 khan BJP te chuan strategy an siamah majority mark nei turin UP ah an chetthat lawrlak a ngai tih an hria a ni” tiin Sandeep Shastri, National Coordinator of Lokniti Network chuan a sawi a.
Chumi atan chuan Prime Ministerial candidate Narendra Modi chuan Gujarat a seat chuh mai bakah UP atangin chuh tel bawk se an ti a, chu chuan UP ah nasa zawkin party a tichak ang an ti a ni a ti a.
“Varanasi a Narendra Modi ding chuan a chhehvel te a nghawng tel vek a. Varanasi-in cultural lama pawimawhna a neih chu danglamna siamtu niin kum 2014 hnulam atang khan development pawh nasa taka kalpui a ni” tiin a sawi.
Varanasi chu BJP hmunpui a ni hrim hrim sa bawk a. Modi factor chuan a belh leh zual ta bawk a. Kum 2009 khan Varanasi-a BJP-te vote share chu 37 per cent a nih laiin kum 2014 ah khan 56 per cent-ah a chho dawrh a, kum 2019 khan 64 per cent-ah a kaichho leh a ni.
UP-ah Muslim voter te pawhin BJP an vote nasa tawh bawk niin Yashwant Deshmukh, Founder-Director of Voter chuan a sawi. “Tun hma chuan BJP ten Muslim vote single digit chauh an hmu thin a, tunah erawh double digit an hmu tawh. Mahse, vanduaithlak takin BJP vote-tu Muslim te chu sarkaari Muslims an tizui a ni” tiin a sawi.
Kumin inthlanah BJP te chuan an winning formula lo hman tawh te thlak an duh lo, Uttar Pradesh bikah an MP nilai mek te an ding leh deuh vek bawk.
Lehlamah erawh Mayawati kaihhruai BSP te chuan minority candidate an uar thung hle a. Akhilesh Yadav pawhin Yadav ticket chu family bikah la humhimin mahse an party candidate tam ber te chu Other Backward Classes te an ni thung a, SP te chuan non-Yadav OBC’s-ah ticket 26 per cent lawih an pe a ni.
Uttar Pradesh-a opposition alliance siama Mayawati tel ve lo chu a pawi thei tiin Deshmukh chuan a sawi a. “Vote share 12.5 percent nei aia vote share 2.5 per cent nei Congress thlan zawk tlat chu hriatthiam a har” tiin a sawi.
Kum 2014 khan BJP te chuan State a seat 80 awmah 71 an la a, kum 2019 khan tlahniamin 62 an la a, kha pawh kha Akhilesh Yadav-Mayawati alliance vanga ngaih a ni.
Kumin hian Samajwadi Party te chuan seat 63 an chuh a, a bak zawng Gandhi bastion Amethi leh Raebareli te pawh Congress share-ah a tel thung.
State pawimawh UP-ah tu nge chak ang?
