State pawn atanga bungraw lalutten
document neih kim ngai tawh dawn
Finance Department (Taxation) commissioner of State Tax HK Lalhawngliana chuan Zirtawpni khan Central Young Mizo Association (CYMA), Mizoram Merchant Association (MIMA, Mizoram Truck Owners Association (MTOA) leh Mizoram Chemist and Druggist Association (MC&DA) hruaitute a kawm a, dan loa Mizorama bungraw lakluh tih tawp a nih theih dan tur an sawiho.
Commissioner of State Tax chuan chhiah lakna dan zawm loa state pawn atanga bungraw lakluh a awm tawh lohnan Mizoram Goods & Services Tax Act,2017 and Rules hnuaiah khauh zawka enfiah a nih tawh dawn avanga mipui hriattir lawk a tul thu a sawi a. Mizoram Goods & Services Tax (MGST) danin a phut angin sumdawng leh bungraw phur luttuten state pawn atanga bungrua an lakluhin heng document – e-waybill, GST tax invoice leh bill of supply (exempt-ah) an nei ngei tur a ni tih a sawi.
Heng document leh an bungraw phurh hi a dik ngei em, tih enfiahnan Vairengte-ah Data Collection Centre din a ni a. Tunah hian dan zawm loa buangraw lalut an tam hle nia hriat niin, hei vang hian kan state-in chhiah a dawn tur ang a dawn loh phah thin tih commissioner hian a sawi. Thawktu indaih lohna avangin Vairengte Data Collection Centre-ah duh ang thalin enfiah hna kalpui theih a ni thin loa, chutihrualin theihtawpin hma an la a, April 2025 atang chuan uluk leh khauh taka kalpui an tum tawh tih a sawi bawk.
Hemi venpui tur hian NGO leh pawl hrang hrang, sumdawng leh mipui tan ho a tul tih sawiin, chhiah luangral tur ven kawngah sawrkar hmalakna tanrualpuiah a sawm a ni.
State pawn atanga bungraw lalutten document neih kim ngai tawh dawn
