Mizoram director general of police thar Anil Shukla chuan state ralmuang ber nih chhunzawm zel na turin police-in theihtawp an chhuah zel dawn tih a sawi.
DGP thar hian Nilaini khan larsap Dr Hari Babu Kambhampati chu Raj Bhavan-ah a hmu a. A a rawn zawm hnuah Mizoram Police hnathawh leh hlawhtlinna hrang hrang uluk takin a bihchiang tawh tih a sawi a. Hmalakna tur leh hmasawnna lai tur nia a hriatte larsap hi a sawipui. Mizoram chu state ralmuang ber a nih chhunzawm zel na turin Mizoram Police-in theihtawp an chhuah zel dawn tih a sawi a. Dan leh thupek kenkawh kawngah pawh a hma aia nasa in tan lak an tum tih a sawi bawk.
Larsap chuan Mizoram Police tana hmasawnna bung thar siam belh turin duhsakna a hlan tih a hrilh a. Police-ten hna an thawk tha nia a hriat thu sawiin, kawng thenkhatah erawh hmasawnna tur a la awm tih a sawi. DGP thar chu tawnhriat ngah tak leh police officer hmingtha a ni tih a lo hriat thu sawiin a thiamna leh theihnate a hna thar atan hmang tangkai chhunzawm turin a chah bawk a ni.
1996 AGMU cadre Anil Shukla hi zirna lamah BE (Civil), post craduate (Police Management) leh Masters in Public Policy & Management degree nei a ni a. International leh national level chawimawina tam tak a dawng tawh a ni. Mizoram DGP a ruat a nih hma hian hian Addl DGP Andaman & Nicobar Islands a ni.
State ralmuang ber ni zel turin theihtawp kan chhuah ang – DGP
