Daily Newspaper

Status quo zone-ah central force dah loh kan duh – MPCC

10

Mizoram leh Assam-in ramria buaina an neih chungchangah status quo zone-a central force dah chu Mizoram tan a tha lo zawk tih Congress party chuan sawiin, central force rintlak zawk dah turin Mizoram sawrkarin sawrkar laipui ngei se an duh tih an sawi.

MPCC thuchhuak chuan, ZPM leader Pu Lalduhoma’n Vairengte daia Mizoram leh Assam police-te inkah ni, July 26 tlailam khan thuchhuah siamin, ramri ah buaina dang a awm tawh loh nan a tulna hmun apianga central force dah turin Union Home minister a ngen tih a sawi thu tarlangin, ‘July 26-a Mizoram leh Assam sipaite inkah chhan hi status quo chhunga duty mek central force (CRPF) ten an tih tur an tih loh vang a ni a. Inkah lai pawhin CRPF duty camp-a humhimna zawnga tlanlut Kolasib SP leh Mizoram police thenkhatte chu CRPF duty-te hian humhimna an pe duh loa, an nunna pawh a derthawng hman hle a nih kha. Hetiang a nih laia helai hmuna central force dah tura Pu Lalduhoma’n Union Home minister hnena ngenna a siam nghal rum rum hi pawi kan ti takzet,’ a ti.

Lailapur leh Vairengte khaw inkarah ‘status quo zone’ zau tak siam a nih thu sawiin, central force an duty reng dawn chuan Mizote luah theih chin leh huan/lo ram atana kut thlak theihna ram kan hloh zel dawn tihna a nih thu te; heng lai hmuna central force an awm reng chuan Mizoram Council of Minister thukhawmin Mizoram ramri atana ‘Cachar Inner Line 1875 ramri’ a lo pawm tawh pawh engtikah mah a tihhlawhtlin theih dawn loh tihna a nih thu te a sawi.

‘Helai hmuna central force an awm loh hi Mizote tan a tha zawk a, Mizote kan invalh zauna daltu an ni zawk. Chuvangin, central force dah tura Union Home minister hnena ngenna siam hi thil tih chi ah kan ngailo a. Pu Lalduhoma’n ngenna a siam hnu lawk, July 28-a Vairengte leh Lailapur inkara duty tur CRPF company 6 an rawn thlen belh nghalte hi Congress party chuan a pawi a ti hle zawk a ni,’ a ti.

July 26-a CRPF duty-te chetdana a lungawi loh thu Mizoram Home minister-in July 27-a CRPF hotute hnenah tawngkaa a thlen chu lawmawm an tih rualin, Assam nena buaina hmunah central force kan mamawh loh thu emaw an rawn dah lui dawn a nih pawha CRPF aia rintlak zawk dah tura Ministry of Home Affairs-ah thlen ngei tura Mizoram sawrkar hian a duh thu Congress party thuchhuah hian a sawi bawk.

‘Ramri buai avanga ramri dep khuaten harsatna an tawk leh thin hi pawi kan ti takzet a. Kil tin atanga huangtau taka min beitu Assam BJP sawrkar thil tih dan hian Mizoram mipui min tilungrual zel se tih hi kan duh takzet a ni,’ thuchhuah chuan a ti.

Get real time updates directly on you device, subscribe now.

Leave A Reply

Your email address will not be published.

This website uses cookies to improve your experience. We'll assume you're ok with this, but you can opt-out if you wish. Accept Read More

Privacy & Cookies Policy