Strait of Hormuz-ah Indian lawng 14 la tang

Strait of Hormuz-ah Indian flag intar lawng 14 an la tang mek a, heng zingah hian tuialhthei phur lawng lian pathum leh LPG phur pakhat a tel a, sorkarin hruai haw an nih theih nan hma a la nasa hle.
February 28-a Middle East-a buaina a chhuah atang khan India chuan he bial atangin a lawng LPG leh tuialhthei phur 10 chu him takin a hruai chhuak tawh.
Iranian Islamic Revolutionary Guard Corps sipaite chuan Inrinni khan India lawng pahnih an kah a, hei hi New Delhi chuan a ngai pawimawh hle a, palaite pawh an indawr zui nghal a. India-a Iranian ambassador koh a ni a, Foreign Secretary Vikram Misri-a chuan he thil thleng hi India-in a ngaih thutak thu a hrilh.
India flag intarna bungraw phur lawngte hi Strait of Hormuz-ah kah an ni a, he thil hi Iranian sorkar leh Revolutionary Guard unit inkara inbiakpawhna that tawk loh vang nia sawi a ni.
Silai hmeh puah avang hian Indian lawngte hi a chhe nasa lem lo hlauh va, lawng hmun thenkhatah chuan darthlalang leh a vuahna erawh a chhe nasahle.
India flag tar lawng 14 chu Strait of Hormuz-ah an la ding nia sawite him taka lak chhuah bakah Iran-a Indian tam tak la awm mekte himna chu New Delhi tan thil pawimawh ber ah thu foreign ministry thupuangtu, Randhir Jaiswal chuan Thawhtanni khan a sawi.
“Silai hmeh puah chungchanga thu hriat a nih veleh Indian sorkar chuan he thil chungchangah hian palai lama hmalakna lian tham tak a kalpui nghal,” tiin ambassador koh chungchang a sawi a. “Indian lawngte himna chungchangah Iranian thuneitute nen kan inbe chhunzawm zel a ni,” a ti bawk.
British pawl, tuipuia sumdawnna enkawltu, United Kingdom Maritime Trade Operations-in a tar lan dan chuan Strait of Hormuz-a lawng pathum captain-te chuan Inrinni khan beih an nih thu an sawi a, heng zingah hian Indian bungraw phur lawng pahnih a tel.
Report-a tar lan a nih dan chuan India flag nei tuialhthei phur lawng beih hmasak ber a ni nghe nghe.
Iranian sipai ta silai phurh telna lawng pahnihin lawng hi an hnaih a, radio warning pe lo leh inbiakpawhna nei lovin an kap a. Lawng leh a thawktute hi an him niin tar lan a ni.
Hemi hnu rei vak lovah Indian lawng dang pakhat chu Revolutionary Guards ten an bei leh a. He pawikhawihna hi Oman tuipui kamah a thleng a ni a. UKMTO report-in a tar lan dan chuan lawng lian eng nge a nih chiah hriat loh thila kah a ni.