Daily Newspaper

Sual thupha chawi leh cancer natna kiam nana tawngtai rel

14

Dawrpui biak ina neih mek Synod Inkhawmpui chuan sual thupha chawia tawngtai rual leh cancer natna a lo kiam theih nana tawngtai rual an rel.

Ningani khan rorel inkhawm neih chhunzawm a ni a, Aizawl Bethel Presbytery atanga lut ‘Kan ram sual thupha chawiin sual sim harhna a lo thlen theih nan leh chhiatna hrang hrang laka kan him theih nan Synod-in ram pum huap tawngtai rual buatsaih rawh se’ tih leh, Aizawl Chhim Presbytery atanga lut ‘Kan ramah cancer natna a lo kiam theih nan ram pum huapin tawngtai rual neih ni rawh se’ tih te chu pawmin an kaikawp a, Synod Executive Committee-in lo bawhzui se an ti.

An thu pawm zingah hian Synod Hospital, Durtlang-a leiba tihzangkhai nana kohhran member dan zawhkim tinin Rs 20 theuh thawh ni se tih a tel.

Aizawl Theological College-a D Th (Counselling) programme hawn an remti a, Theological Education Board-in lo bawhzui se an ti. Synod Hospital, Durtlang-a research work kalpui theihna tura policy neih an remti bawk. Mizoram Presbyterian Kohhran leh Presbyterian Church of Wales te’n inkungkaihna tha zawk an neih theihna tura rawtna an pawm bawk.

Kristian Hlabu-a mi ‘Lal Isua hming i fak ang u’ tih hla lengkhawm hla thluka sak chungchangah Synod-in thuchiang nei rawh se tia rawtna chungchang pawh an ngaihtuah a, hei hi a tlang lo.
2021 chhunga Pastoral Ministry thupui atan ‘Nun Fimkhur (Ephesi 5:15) an thlang a, 2021-22 chhunga budget atan Rs 3,79,20,14,000 an pawm. Hei hi a hmasa aiin 1.13%-in a tam.

Rorel inkhawm, Nilaini-a tan hi Ningani-ah an zo a, inkhawmpui hi Zirtawpni-a zawh tur niin, a tawp ni hian Pro Pastor nemngheh, Pro Pastor atana lak tharte dahngheh, pension-a chhuak turte thlah leh Pastor boralte sunna hun te hman a ni ang. A tawp ni hian moderator kalchhuakin valedictory sermon a sawi ang. Zirtawpnia hun hman tur hi TV lamah live-a tihchhuah a ni ang.

Get real time updates directly on you device, subscribe now.

Leave A Reply

Your email address will not be published.

This website uses cookies to improve your experience. We'll assume you're ok with this, but you can opt-out if you wish. Accept Read More

Privacy & Cookies Policy