Daily Newspaper

SUANGTUAHNA VAKVEL

37

Vidpuia Hrahsel

Khuanu duan hringfa ve mai, pumrua en pawh a, mi vantlang pha ve tawk, sakruang kimtlang lah mawi han tih tur em em ni si lo khawpa dul hma lam ti kiar ve ngawt satliah ve mai mai hian, hringnun zinkawng tawite ka zawh ve mekah hian, veizawng ka ngah ang lawi bawk si a! Thaikawi bawngte thawn tur pawh la hmu zo chuang si lo hian, ka suangtuahna vakvel te ka rawn thaikawi ve ang e.

Hmanlai atangin bul tan phawt ila, kan pi leh pu te khawvel nun hman dan kha a kip a kawi in hre lo mah ila, an lo duai lohzia leh hringnun khawvel an zir dan leh an chen dan te, an tawngkauchheh hman te, kan nun hman mek thleng hian khawvela cheng kan nih miau avangin kan chhawm lo thei lo a. Mizo tawng Upa a ‘Lampui chang khatah mi an be chhe ngai lo’, tih chungchang hmangin i’n ziak daih teh ang.

A bik takin Khawvela cheng theuh theuh, kan hmuh phak chin theuhah hian a hnam ang zawngin Mizo Hnam hi vantlang huapa inkhawm / punkhawm nei tam kan ni a, Mihring zat inchhiarah pawh kan tlem tih a hriat. Inthenawm-khawvenna lam erawhah chuan keini tluk a, mahni mihringpuite laka ngilneihna leh induhsakna tilang hi an vang khawp ang. Inkawm khawm a, a tul hun a, inpui tawn te, hian mihring kan inmamawh tawnnaah thu tam tak a hril reng a ni. Khuanu’n a duh taka siam Mihring te hi famkima piang ni ta ila, khawvel hi a ho duh zawk ngawt in ka ring! Pathian zawng a famkim a, Ani chu keini tan chuan thik chu sawi loh awm lo ata awma min siamtu amah AWMA kha a ni miau! Awm lo ta se, kan awm awm tawp si lo, hringnun kawng kan zawh mekah hian tu pawh hian thatna lai leh that lohna lai kan nei vek a, famkim lova min siamtu hnenah kan fam hunah kan kir leh vek dawn si a, khawvel kan cham chhung hian inhriatthiamtawnna nena hun kan hman ho hi a va duhawm tak em!

Thil reng reng i sawi hma in, ngaihtuah hmasa rawh ti daih teh ang. Khawilai emaw dawr teah kan thukhawm laih laih a, mi chungchang kan sawi laih laih a, dawr kan thutna chu REL (Rail Station) hi a ni ringawt zel. Mahni mihringpuite fakna ai chuan, an chhiatna lamin kan rilru a luah zawk tlat thin te, an thil tih that lam aiin an chhiatna lai a langsar lo thei lo a, an zah tawh ngawih ngawih sa nak alaia, kan run luih a, chhaih zui kan pawi tilo lutuk te, mahni famkim emaw intih mai tur a, mahni intheihnghilh a, indah fihlim kan ching thin te hi a va vei awm em, kan sim thei chuang si lo. Mi sawisel kan hlau a, kan duhnaah chuan kan insawipui thei tlat mai te, mi lakah chuan duham hlau siin a rukin kan induhsaktawn tawn tlat thin te, mi chapo nih duh chuang miah si lova, insawitheih bansan kan tum chuanglo te hi insiam that kan va ngai tak em aw! Kan tawng Upaah ‘Lampui chang khatah mi an be chhe ngai lo’, tih a dikzia hi han sawi ila, inrel sual hi hlauhawm deuh a nia. Mizo hi hnam tlem te kan nihzia a hriat vek a, han insawi insawi ila, kan lo inchhung khat leh nge nge zel kan tih chawk hi maw. Mahni vengchhung theuh inen ila, chhungkuaa awm khawm tel tel, khaw khat chhuak te, hnam pui te, colony-a cheng ho tih te, & sons tih te i hmuh chuan mi rel miah suh! Inrel sual a hlauhawm a, mi chanchin i sawi dawnin ngaihtuah hmasa phawt thin la, i chesual lovang.

Khawvel eng hmu tura kan chhuah dan inang theuh si hi, khawvel kan chen dan hi a inthlau thei hle tak ang. Mihring kan inang lo vek miau sia alawm le. Bible hian chiang takin a lo ziak diam tawh. Thufingte 22:2 ah chuan :-

Mi hausa leh mi rethei an awm za a,
An vaia siamtu LALPA a ni..

tih chiang takin kan hmu. Hlain a lo sawi tawh angin ‘Thihna hma a, ang khata kun za tur hi tunge inthlei thei?’ tiin, Khawvel kan cham chhung hian tumah hi inbe chhe thei kan nih lohzia te, Pathianin amah anpui leh a duh dan tak a, a siam theuh kan nihzia te, inthlei thei kan awm lohzia te hi hriat thar fo a va tul em. Hringnun kan hmannaah hian inel si lovin kan iner thûm a, infak si lovin kan inkap a, infuih zawk lovin kan inrel thung si. Mi nun kan teh dawn hian, mahni inteh thin ila, Pathian atanga chhia leh tha hriatna kan dawn te hi kan hman thiam a va pawimawh tak em. Tu pawh hian mi chungchang kan sawi hian, nunhlui nei lo ang maiin kan awm a, midangte nun an dai sual zeuh palhin kan lawmpui zawk emaw tih mai tur hian kan sawi laih laih thin hi chu, insiam that kan ngai hle. Mi reng reng kan sawi hian, eng ang dinhmunah nge an din tih lam ai in, a dinna lam chauh kan en thin a, a lehlam hi thlir thiam thin ila, kan inhrethiam tawn tlang thinin ka ring. Famkim lohna khawvelah hian famkim taka nun tum suh, tu mah famkim kan awm lo, kan la fam vek dawn si a.

Chuai thei lo British Rock Band, The Beatles-a an khaipa ber John Lennon khan a suangtuahna ram hlain a phuah chhuak a, a hla chang lina :-

Imagine no possessions
I wonder if you can
No need for greed or hunger
A brotherhood of man
Imagine all the people
Sharing all the world

Itsik errelna awm lo ta se,
Han suangtuah chhin teh,
Riltam leh tuihal a awm lo ang a,
Unau ang maiin kan inlungrual awm si a,
He khawvelin engkim, an insem za dial dial tur hi,
Suangtuah chhin la, a va nuam dawn em.

A suangtuahna ramah a cheng a, lungrual leh intluk tlang tak a, in rel, in sel, in er awm lo turin a duhthu a sam a, amaherawhchu khawvela cheng kan ni miau si a. Mi rethei leh hausa kan cheng za a, min siamtu Lalpa rorel dan hi kan hriatthiam phak a ni si lo, âm takin a suangtuahna hmangin a duhthusam hi mi zawng zawng sàm a ni ve ngei ang le. Khawvel lungrual taka awm a, zai khat vawr zaa len ho te, duh mah ila, famkim lohna khawvela cheng kan ni miau si, kan dam chhung tawiteah hian inhmangaih tawnna nena kan chen ho theih hi a va duhawm em.

Engvangin nge kan sawi chhuah hmain ka ngaihtuah chian a tul? Kan thil sawi ho te a, kan ngaih te khan, mi thinlungah engtiangin nge a thawh theih hi kan sawi lawk thei miah lo, tawngkam khat chauh pawhin, mi nunna i pawt seiin, i ti tawi thei tlat. Fakna thu a ni emaw, mi fuihna thu a ni emaw, mi deuhsawhna thu pawh ni se, a dawngsawngtu tan ngaihthlak a nuam ang em tih kan ngaihtuah hmasak loh hian, mi rilru kan ti na thei a, an beisei kan tihbo sak vek thei bawk si a. I tawngkam tha pakhat te maiin, nunna a chhan thei tlat thung lawi bawk si. I thusawi chhuah hma khan, uluk takin ngaihtuah hmasa thin rawh, eng thil nge a thlen dawn tih nen. A chhan chu maw, thumal pakhat i ka atanga a chhuah tawh chuan i la let thei tawh si lo. Ngaihdamna âw ka chhuah nawn leh mah se, a hmasa zawkin a tihnat tawh chuan sût leh rual a ni tawh tlat lo a. Pawi i sawi hnu chuan a nih tur ang a lo ni zo vek tawh thin si a. Pathian thu ah pawh hian chiang takin a lo inziak diam tawh si a, hetiang in :-

Thufingte 15:1
“Chhânna nemin thinur a tikiang thin a, tawng huatthlala erawh chuan thinur a chawk tho thin.”

Hengte avang hian kan tawngka chhuakah hian fimkhur a ngaihzia a hriat.

Hmaichhana infak te hi thil zahthlakah kan ngai a, tlawmah kan la a, a hun leh a hmun azir a, indah hniam kan thiam lohna hian min ti hawihhâwm lo. Mi thatna lai kan hmuh kân a, an that lohna lai kan hmu chat a, sawi nuam kan la ti em em zui a, thil kal tawh sawi nuam kan ti tlat thin te hi kan chin tha lo tak a va ni em. Famkim lo Mihring kan nihna ti chiangtu chu, kan mi tluk loh te bak hi kan sawi peih lo reng reng. Kan aia hniam zawk anga kan ngaih te hi kan sawi peih lo, kan mi tluk loh leh kan aia hlawhtlingte lawmpui hi a har kan ti chawk a nih hi maw. Kan Pi leh Pute khan mi hlimna leh lawmna thlen turin zirtirna tha tak min hnutchhiah a, ‘tawngkam thain sial a man’, tiin. Pathian thuah ngei pawh hian chiang takin a inziak nghe nghe.

Kolassa 4:6 :-
“Mi tin engtia chhan theuh tur nge ni tih in hriat theih nan in tawngka chhuak chu, chia al, khawngaihna tel ni fo rawh se.”

Kan tawngkam chhuak hi fimkhur a va ngai em, chi a al, khawngaihna tel ni fo thei se, midangte tana hriat leh pai nuam tak leh tawngkam dawnsawn nuam zawk khawngaihna tela kan tawng chhuah hi Pathian hian a duh a, kan nun theuhah midangte tan a lawmna siam leh a tha zawnga infak zel hi kan tih tur makmawh chu a ni. Inrelin sel awm tawh lohna Khawpui Mawi kan thlen hunah hengte hi a kiang chauh awm si a, lungrual taka kan awm za tur chu i nghak fan fan mai ang u.

(THE AIZAWL POST – Article)

The Aizawk Post

Full>> ePaper Subscribe

Get real time updates directly on you device, subscribe now.

Leave A Reply

Your email address will not be published.

This website uses cookies to improve your experience. We'll assume you're ok with this, but you can opt-out if you wish. Accept Read More

Privacy & Cookies Policy