Subroto Cup U-14: Mizoram champion zo lo
October 2-10, 2023 chhunga Bangalore khuaa khelh zawh tak 62th Subroto Cup International Football Tournament 2023 Under 14 final-ah Thawhlehni khan Mizoram hminga chhuak Chawngfianga M/S, Saidan, Kolasib chu sikhat fai lekin India rama football academy tha Minerva Academy, Punjab-a zirlaite lakah an tlawm a, runners up ni chungin Best School Award an dawng.
Airforce buatsaih Subroto Cup Under 14-ah hian school 21 an tel a; pool hniha inthen-in knock out system hmanga khelh a ni.
Pool phase-ah Mizo naupangte hian 13-0 tehrenga Delhi sawp chungin bul an tan a, quarter-final lamah West Bengal chu 5-0 ngawta sawp zui lehin, semi-final match-ah hmarchhak team ve bawk Megalaya laka 1-0 in hnehna an chang hram.
Final-ah hian Minerva Academy, Punjab nen in tumin an in hneh tawk hle. An innawrtawn zak zak a; hun pangaia goal a luh loh hnu hun pek belh hmang tangkaiin Punjab naupangte hian free kick atangin champion-na goal an khung ta a ni.
Mizoram team Chawngfianga M/S nau-pangte hi sports department enkawl Saidan Football Academy zirlaite vek an ni a; coach Lalthawmmawia leh manager Rozam-lianate’n an hruai. Vawiin hian Aizawl panin Bangalore an chhuahsan ang.
Manager Rozamliana chuan, “Vawiina kan tumpuite kha academy thaa zir mekte niin, an zirna academy kha India rama talent nei thate la khawm a, enkawl mektute an ni.
“Chuti chungin a khelhah pawh kan hneh zawk a, goal attempt pawh kan ngah zawk a, hun tawp hnu minute hnih an pek belh last second tak takah goal an khung a, an vannei ta a ni,” tiin final-a an khelh dan a sawi.
Hawnna tur ticket chungchanga harsatna an tawh laia buaipuitu MP K. Vanlalvena chungah lawmthu an sawi.
Mizoram team
1. Lalmuanpuia Colney
2. C. Vanlalchhanhima
3. R. Vanlal\anpuia
4. Zoremsanga
5. Vanlalmuana
6. Malsawmtluanga
7. Lalhnehzova
8. Isak Lalmalsawma
9. Lalruatdika
10. Lawmsangzuala
11. Lalrempuia
12. Malsawmkima
13. Vanlalchhanhima
14. Lalvohbika
Coach : Lalthawmmawia SYS
Manager : Rozamliana SYS