Sudan damdawi in beihnaah mi 64 thi, a titua puhna sipaiten pha
Sudanese sipaite chuan an ram khawthlang lam khawpui, an khingpui paramilitary Rapid Support Forces (RSF)-te hnuaia awma damdawi in lian beihna, mi tam tak thihna thleng chu an tih a nih loh thu an sawi.
World Health Organization (WHO) hotu chuan el-Daein Teaching Hospital beihnaah hian naupang 13, nurse pahnih leh doctor pakhat telin mi 64 an thi tih sawiin mi dang 89-in hliam an tuar bawk.
Tedros Adhanom Ghebreyesus-a chuan, “Thisen a luang nasa hle a ni,” tiin X-ah a. Kum thum dawn kalta atanga buaina intan tawh hi titawp turin a ngen nawn leh.
RSF chuan Muslim-ten Eid an hman ni khan East Darfur state khawpui, el-Daein-a hospital hi sipai drone-a kah niin an sawi.
Sudan hi April, 2023 atang khan tual chhung indonaah an lut a, kum 2021-a sorkar paih thlaa thuneihna an chan hnuah hetih laia tangrual, sipai leh RSF-te inkarah thuneihna inchuhna a chhuak a ni.
Hemi hnu atanga buaina chhuakah hian mi 1,50,000 chuang an thi tawh a, mi maktaduai 12 vel an chenna in chhuahsanin an tlanchhe tawh a, an rama cheng hmun thuma thena hmun khat vel an tling a, United Nations chuan khawvela mihringten harsatna an tawh nasatna ber niin a sawi hial a ni.
Dr Tedros-a chuan Zirtawpni zana el-Daein Teaching Hospital beih a nih atangin hna an thawk zui thei tawh lo tih sawiin damdawi inte beih a ni fo chu a dem thu a sawi.
WHO hotu chuan, “Kum thum dawn chhung buaina chhuak tawhah hian WHO chuan damdawi hmunhmate beihna vawi 213-ah mi 2,036 an thi tih a chhinchhiah a, Zirtawpni zana mi pawh kha a tel,” tiin X-ah a tar lang.
“Sudan-a buaina chhuak hi tihziaawma civil mite, damdawia thawk leh mihring puihna lama thawktute tana thawha thawh hun a ni ta,” a ti.
“Damdawi inte hi bitum a ni ngai lo. Remna hi damdawi tha ber a ni,” a ti bawk.
Thuchhuah siamin RSF chuan beihna hian damdawi in chhawng chung lam a tichhe vek a, accident leh emergency department a chhiat zual thu leh hmanraw pawimawh tak tak a chhiat thu an sawi.
Sipaite chuan he pawikhawihna thlentu nia puhna chu mak an tih thu an sawi a, ‘khawvel huap dan leh kalphung’ an zawm tlat thu an sawi.
Emergency Lawyers pawl chuan mi hrangin langtlang taka an chhuia mawhphurtute chu rorelna hmaa hruai an nih theih nana hmalak an ngen.
Indo chhung zawnga sipai leh RSF-ten pawikhawihna an thlen dan chhinchhiahtu, tual chhunga mihring dikkna humhalhtu pawl chuan el-Daein-a damdawi in hi khawpui chhung leh a chhehvela khaw hrang hranga civil mi sang tam takin an rinchhan a nih thu an sawi.
East Darfur hi Kordofan region ramri a ni a, indonaa inbeihna a nasat tharna niin ni tin deuhthaw drone hmanga inbeihna a awm.
He hmun hi RSF-in a thunun, Darfur chhim lam bial leh nikuma sipaiten an lak let leh tawh an khawpui, Khartoum nena inzawmna pawimawh a ni.
Tunah chuan Africa rama civil miten an thihpui tam ber indonaa ngaih hi US kaihhruaia remna siam tumin hma lak mek a ni.
Sudan damdawi in beihnaah mi 64 thi, a titua puhna sipaiten pha
