Sudan-a UN envoy chuan indo mek general pahnihte chu May 22 zanlai atanga inkahhaina nisarih awh chu zawm ngei turin a ngen.
Volker Perthes chuan UN Security Council hnenah April 15 atanga buaina intan tawh chuan ziaawm lam a la pan lo tiin a sawi a, pawl pahnih tena a hma pawha inkahhai an puang chungin a la nasa reng tiin a sawi.
Tun tumah erawh inbeihna an tihtawp lailawk ngei ngei a ngai a, chutiang a nih loh chuan civilian te puihna tur te chuan an tum ram an thleng thei dawn lo tiin a sawi bawk.
Kar kalta Inrinni khan US leh Saudi pali te chuan Saudi port city Jeddah a inbiakna an neihpui hnuah Sudanese army Gen . Abdel Fattah Burhan leh paramilitary Rapid Support Forces kaihruaitu Gen. Mohammed Hamdan Dagalo aiawh te chuan inkahhai a awm theih nan hian inremna an ziak a ni.
Tun hi inkahhai tum sarih siamna a ni tawh a, a hma zawnga inkahhai siamte chuan zawm a hlawh ngang lo vek thung.
Tun tuma inkahhai erawh US leh Saudi Arabia te hmalakna ni thungin ruahmanna siamah inkahhai bawhchhiate chhuizui theihna te siam a nih avangin a hma zawng ai chuan tha zawk tura ngaih a ni a.
Indo mekte atangin aiawh mi 12 awmna committee din niin anni bakah hian US leh Saudi Arabia aiawh pathum awm bawkin chung mite chuan inkahhai chu zawm a nih leh nih loh an enfiah zui dawn a ni.
Suliman Baldo, director of the think tank Sudan Transparency and Policy Tracker chuan tuna inkahhai hi chuan zawm a hlawh an beisei thu a sawi a. “RAF te pawh hian chawlh an mamawh a chhan chu Khartoum ah SAF te chuan residential area atanga RSF unit te nawrchhuah an tum tlat a ni,” tiin a sawi.
Perthes chuan inkahhaina chu tihthar leh reng theih a nih thu sawiin thil lawmawm a nih thu a sawi a, mahse, inkahhai a awm dawn tih hre reng chungin sipai pawl pahnih te chuan an chetvelna an la bansan chuang lo tiin a sawi bawk. Buaina chu civilian tena an tawrh ber thu sawiin tun buaina avang hian civilian 700 chuangin nunna chan phah tawhin heng zinga 190 chu naupang an ni a, mi 6,000 chuangin hliam an tuar tawh bawk a, mi maktaduai khat vel chenna in leh lo tlansanin an awm tawh bawk.
Sudan ram chhungah in leh lo chhuahsan 840,000 vel an awm a, Sudan chhuahsan mi 250,000 vel an awm bawk.
Perthes chuan sipai pawl pahnih te chu capital Khartoum mai bakah western region Darfur lamah te dan leh hrai zahna hre lek lova chetla tia puhin chenna In, dawr leh sakhaw biakna hmun te, tui leh electricity hmun te beiah a puh ve ve bawk.
Sudan-ah health facility ten harsatna namen lo tawk tawhin damdawi In hmun thuma thena hmun hnih vel kharin a awm tawh a, health worker te thahin an awm a, medical supply a tlem tawh a, health facility te sipai pawl pahnih ten inkhuar nan an hmang an ti bawk.
Sexual violence hmeichhia leh hmeichhe naupangte lakah kalpui nasa tia sawi chu a bik takin Khartoum leh Darfur chhehvelah a nasa tia sawi chu UN chuan an chhui chian tur thu an sawi bawk.
Kum 2000 tir lam khan Darfur a African tribes te chuan hnuchhawn tia insawiin Khartoum sorkar lakah an hel a, chumi tukdaih nan chuan International Criminal Court in genocide a tihhial khawpa kalpuia chetlak a ni a. State sorkar thlawp Arab militia Janjaweed tihte chuan nasa taka mi tihlumin hmeichhia pawngsualin an che nasa hle a. Heng Janjaweed te hi tun huna Rapid Support Force tihte hi an ni ta a ni.
Sudan inkahhaina zawm turin ngen
![](https://theaizawlpost.org/wp-content/uploads/tap_logo-min-large.jpg)