Suga ‘Suchwita’-ah Jin inlan
BTS member Suga chuan a drinking show hriathlawh tak ‘Suchwita’ chu episode thar a nei leh ta a, tun tumah hian mikhual ‘cial zet mai nen an titi dun dawn a ni. He program episode 12-na tur hi a teaser an tichhuak a, chutah chuan Suga khualthaah BTS member tho Jin a tang a, South Korean sipai-a Jin a luh hma lawka an lak a ni.
Suga leh Jin te hi an hmel lang thei loa inhliahin, zu nen an titi a, an training hunlai te an sawi a, BTS fans leh sipai tang tura inbuatsaih chungchang te pawh an sawi.
Video clip-ah hian Jin chuan, “Tunah chuan kan ram tan theihtawp chhuahin ka awm mek tawh ang. Harsatna ka tawh ka ring lo, chuvangin min lo ngaihtuah lutuk lo ula. BTS hi lo theihnghilh lo ula, in hmangaihna leh support-na in lo tilang zel dawn nia,” a ti.
Suga chuan, “He show khualtha atana sawm chhuah harsa ber pawl i ni chiang khawp mai,” a ti a, Jin chuan, “Ka sipai tan hma ni li chauh a awm tawh a. Ni li chiah hun ka nei tawh. Member dang ten, ‘I sipai tan laia ARMY (BTS fans) ten Suga show-a an lo hmuh theih che hi a tha dawn asin’ an ti a. Chuvanga show-a rawn inlan ta ka ni,” a ti.
A hnuah Jin chuan BTS member anga an debut dawn lai vel sawiin, “Ka hi khatih laia debut ve tawp lo tur kha ka nia…thiam thil kha ka nei ve mang lo. Zaithiam tak ka ni lo va. Lamthiam tak lah ka ni hek lo. Mite hmuha han phochhuah tur em em kha ka nei vak lo,” a ti.
Mahse, hei hi chu Suga’n a pawmpui lem lo, “Eng nge thiam nei mang lo i intih chu a awmzia? Kan team zingah i tih theih ang ti thei ve hi tumah kan awm hleinem,” a ti ve thung.
He Suchwita special epidose hi June ni 10-ah an tichhuak dawn a, chutih hunah chuan BTS 10th anniversary nan ni thum chauh a awm tawh dawn a ni. BTS kum 10 tlin lawmna hi Yeouido, Seoul-ah neiin, BTS 10th Anniversary FESTA chu June ni 17-ah an nei dawn a, hei hi mipui tana chhim theih a ni ang.
Suga ‘Suchwita’-ah Jin inlan
