Vice President Jagdeep Dhankhar chuan budget session neih mekah thu a sawi a, Mizoramin kawng hrang hranga sum dehchhuahna a neih that zingah tourism hming a lam hmasa ber a, a dawtah horticulture.
Sawrkar laipui atanga mi pawimawh lo kalte hian Mizoram hi thlawhtheihna atangin an rawn chhuk thlir a, Mizoram leilung mawina an han hmuh hian, sum dehchhuah nana tourism lama potential kan neih thatzia hi an rawn hmu nghal zung zung mai a. Chumi dawtah, sum dehchhuah nan leilung chhungril kilometre tam taka thuk verh aiin, lei pawnlang feet khat vel chauha thukah hausakna tham thawhchhuah theih a ni tih an hmu nghal a, horticulture hming an lam ri thin bawk.
Heng zawng zawng hi kan ram hruaitute hian chung lam atangin an thlirin an hmu zing ve viau awm e; mahse, tourism leh horticulture lama potential kan neihthatzia hi an hmu lo nge, an hmu tho na a, an bawhzui peih tak tak lo thin zawk? tih hi zawhna lianpui mai a ni lo thei lo thin.
Tourism chawikanna tura sawr kar laipui sum hmanga thawh chhuah tur pawh kan puitlin hlei thei lo thin a ni a. Keini aia hmunhma nei chhe zawkte nen project inang kan han thawk a, anni lamin an hlawhtlinpui theih laiin, a hmunhma, sik leh sa engkim nei tha zawk keini chuan hlawhtlinpui chu sawi loh, thubuai awrh tawk velin kan chhuah thei hram a, skywalk ang chi te….
Tunah hian social media a lo chak tak em avangin, sawrkarin a thawh chhuah em em pawh ni lovin, khualzinten social media lama an thehdarh chu khualzin tam takin Mizoram an hmelhriatna lian tak a lo ni thei ta a, a vanneihthlak hle a, keimahni lam hian he advantage pawh hi kan hman tangkai thiam zui a, kan bawhzui chak a pawimawh hle a, chu pawh chu kan la Ui pui tui lian thlir liam leh mai mai ang tih hlauhawm tak a ni.
Tourism leh Horticulture-ah hian harhtharna kan mamawh hle a ni.
Sum dehchhuahnan ‘tourism’: Vice President
