Sum lama Congress che thei lova siam

Income Tax (I-T) Department te chet lak dan chungchangah Prime Minister Narendra Modi chu na taka beiin party chief hlui Sonia Gandhi chuan Modi chu awmze nei taka Congress party sum lama phehthluk tum tiin a sawi.
Congress president Mallikarjun Kharge pawhin sorkar chetlakna chuan inthlanna turah ‘level playing field’ a siam lo tiin a sawi a. Eng vangin nge tun thlenga inrawlhna an la nei lo chu zawhna a neih thu sawiin Rahul Gandhi pawhin India hi democracy a ni tia sawi chu ‘dawt’ a ni tiin a sawi bawk.
Press Conference Congress president in a kohah hian Rahul Gandhi bakah party senior leader te pawhin an telpui bawk a.
Chairperson of Parliamentary Party Sonia Gandhi chuan, “vawiina harsatna kan sawi te hi thil pawi tak mai a ni a. Congress chauh a nghawng lo va, Indian democracy pawh a nghawng a ni” tiin a sawi bawk.
“Awmze nei takin Congress chu sum lama che thei lova siam tum a ni a. Tihluihna in kan sum min chhuhlui a, tichung pawh chuan theih tawp chhuahin campaign kan kalpoui mek a. Hetiang thil hi la thleng ngai lo niin democratic kalh a ni” tiin Sonia Gandhi chuan a sawi.
Kharge chuan, “18 Lok Sabha inthlan tan a ni tawh a, khua leh tui tin te an phur tawh a ni. Democracy ah chuan duhsak bik nei loa inthlan leh level playing ground chu tihmakmawh a ni a. Rorel lai ten resurces an pumbilh bik tur a ni lo. Media pawh ruling party thunun a ni tur a ni lo. Central agencies te chu ruling party tena an thunun vekin a awm mek a ni” a ti a.
“Supreme Court thupek anga electoral bond data tihchuah chu zahpuiawm leh ngaihthatthlakloh a ni a. Tunah hleihneihbik awm lova inthlanah pawh zawhna a awm ta. Supreme Court in bond scheme dan kalh leh constitution kalh a ti a. Mahse, ruling party chuan chu scheme hmang chuan crore sang tel tehmeuh a hui tawh , chutih laiin opposition party lian ber te account chu khawih chet theihlohin an dah zui a. Hei hian nghawng natak a nei dawn” tiin Kharge chuan a sawi bawk.
“BJP te hian electoral bonds pumpuia 56% lawih an hauh a. An advertisement te chu hmun tinah, TV leh newspaper tinah a awm a. BJP te office lah five star ang mai a ni a. BJP tena an sum neih dan ka sawi duh a ni lo. Constitutional authority te chu inthlanna felfai leh zalen huaihawt turin ka ngen a ni” tiin Kharge chuan a sawi a.
“Kan account kan duh anga kan khawihchet theih an remtih a ngai a. Tax buaiah court in thutlukna a siam kan nghak a ni. Sorkar leh ruling party hian zalen taka inthlan kan hmachhawn an duh lo a ni” tiin a sawi bawk.
Rahul Gandhi pawhin, “In bank account, i ATM card leh in chuhngkua financial identity nuaibo vek nise tiin han ngaihtuah teh. Chung thil chu in chhungkuaah a thleng a nih chuan riltama thih a ni mai. Sumdawnte laka a theln chuan an tlachhia ang a, chutak chu Congress laka an chetlak mek dan chu a ni” a ti bawk a.
“Democracy humhim tur institution court leh Election Commission ang te a awm. He hmalakna hi Prime Ministyer leh Home Minister in Congress laka criminal action an kalpui a ni a. India hi democracy a ni th chu dawt a ni” tia sawi bawkin Rahul Gandhi chuan, “India mipui 20% ten min vote a. Tunah chuan kan hruaitu te zin nan railticket pawh kan lei thei lo va, advertisment pawh kan ti thei lo.” a ti a.
“Court in engmah sawi a nei duh lo va, Election Commission in engmah sawi a nei duh lo va, media ten engmah an sawi duh lo bawk. Indian institutions te court a ni emaw Election Commission a ni emaw te hnena ngenna ka siam duh chu hei hi Congress party bank account khawihchet theihlohna siamna a ni lo, democracy che thei lova siamna zawk a ni” tiin Congress leader Rahul Gandhi chuan a sawi bawk.