Vairam atanga company lian ten inthlana an party tana sum rawn thawh an tumna chu an hnawl tih ZPM vice president Dr Kenneth Chawngliana chuan a sawi.
Zirtawpnia an party office-a inkhawmah ZPM vice president chuan sum chu inthlanah a pawimawh a, an party-ah budget a tlem em em a, sum ngaihtuahtu tur inruatin budget siam ve mah se, khawi atang maha lakluhna an nei bik chuang loa, party dangte MLA pakhat senso chu an candidate zawng zawngin an hmang tling lo hial tih a sawi.
“Vairam atang pawhin company lian tam tak rawn kalin min finance theih thu an rawn sawi a, min sawm nasa em em a. Amaherawhchu, kan hotuten a hnu leh beiseia hetiang rawn kalte hi rethei hle mah ila hnawl ngam ang u, an tih avangin kan hnawl vek a ni. Tunah hian khatiang tel loa kan kal thei hi a lawmawm em em a ni,” a ti.
Tuna a landan chuan ZPM-in mahniin sawrkarna an siam dawn a, chu chu a thli tleh dan pawh a ni tih Dr Kenneth Chawngliana hian sawiin, “Tunhma kha chuan unit pawh nei mang loin candidate-te kan nei a, mahse khati zat MLA-a an tling thei kha a ropui. Tunah erawh party azawnga unit ngah ber kan ni ta hi a lawmawm a ni,” a ti.
Sum min pek tumtute kan hnawl – ZPM V/P
