ZPM chu kuthnathawktute hmangaih ang taka inchhal, ruahmanna pawh siam anga insawi siin, an sawrkar hnu leh budget an pharh hnu ah chutiang lam hawi a lang zui lo tih MNF party chuan an sawi.
MNF Publicity Board vice chairman J Malsawmzuala Vanchhawng chuan, loneitute hmangaihtua inchhal an nih laiin 2024- 2025 budget hmanga an lan chhuahtir dan erawh a letling hlauh tih a sawi a. Lo neih leh a kaihhnawih (agriculture & allied activities) atan hmathar lakna tur (capital expenditure) ah cheng nuai 8107 chiah an dah a, hei hi MNF sawrkar liamta in revised estimate-a a dah nuai 16916.90 aiin, nuai 8807 (48%) in a tlem zawk a. Agriculrure, Horticulture, Crop Husbandry, Animal Husbandry ang chia sum dah nasa takin a tlahniam vek tih a sawi.
Sawrkar hmasain SEDP sum vbch. 150 a hnutchhiah atangin thlai thar leina tur ZPM sawrkarin vbch. 110 a dah a, SEDP dawng turten an dawn chhunzawm theih loh phah rualin, kuthnathawktute tana a ruahman nghal kha kuthnathawktute an lo lawmpui em em laiin, sum awm sa reng chung sia hmunphiah an lei duh lo tlang ta leh, kuthnathawktuten sum tam tak an hloh phah ta erawh pawi an ti hle tih a sawi. Loneituten lo vatin an hal fel leh vek tawh a, tun thlenga sawrkarin thlai thar lei dan turah ruahmanna mumal a la puangzar lo leh kuthnathawktuten eng ber nge an chin dawn tih pawh hre thei loa, rilru buai taka dah an la ni ta reng chu pawi an tih thu sawiin, “Loneitute pual bika budget-a sum dah nasa taka tlahniam chho nena enkawpin, mirethei leh kuthnathawktute tana ban phak loh sawrkar, mahni inhaivur sawrkar kan hrawn mek tih a lang,” a ti.
Chief minister-in budget-ah chhiarkawp dik lo a tam lutuk a, Vaibelchhe sang tela kumtin chhût dik loh kumkhua tur a nih a rin loh thu a lo sawi tawh a. Sawrkar kal tawh zawng zawnga budget pharh kha sawrkar hnathawkten thi leh thau pawlha ngaihtuahna senga zankhaw taireka hun leh tha an lo senna niin, chhiarkawp dik lo pui pui a awm ngai hriat a ni lo tih MNF adviser ni bawk J Malsawmzuala hian a sawi.
“Sawrkar hnathawkte diriamna leh cheksawlhna hi kan hotu lu ber kâ atanga a chhuah fo loh hi sawrkar anga thawh ho nan pawh a pawimawh a. Hetihrual hian chhiarkawp mak tak, mipui bum tumna, budget pharh taka lo lang chu sum puk tur chungchang hi a ni,” a ti.
Sawrkar sum puk zat tur tlahniam anga lantir tum vangin ways & means advance-ah cheng nuai 3 chiah budget-ah tarlan a nih thu leh 2023- 2024 ah vbch. 1000 dah a nih thu sawiin, “State sawrkar sum Reserve Bank of India (RBI) in a vawn hi hman zawh ret a nih chuan sawrkar mualphona a ni a. Ni 7 aia tam overdraft phei chuan treasury khar a ngai hial thin. Chumi pumpelh nan chuan central sawrkarin ways and means advance chu a hman lawk tir thin a. Chu chu state sawrkar sum hmuh hmasak ber atangin a rulhsak leh mai thin. Leiba tak tak ang a ni lo. Ways and means hmanga sum hman lailawk tur tih tlem vak hi budget tha anga lantir tumna, sum puk tlem anga lan tumna, mipui bumna a ni,” a ti.
Ways and means advance-a cheng nuai 3 chauh dah a nih avang hian kan sum puk tur chu vbch. 698 vela tlahniam tur angin a lan phah a. Hei hi langsar taka mipui bum tumna a ni tih a sawi.
ZPM party-in Lok Sabha MP candidate an vawrh chhuah danah ‘Kan ram, kan hnam leh kan sakhua’ himna tura thawh hlawk tur lam aiin, sum hai chhuah dan thiam tur lam an dap zawk nia a lan avang leh 2024- 2025 budget an pharh takah mahni inhaivurna lam a lansarh hle bawk avangin, mipuiin ngaihtuahna sen nawn a tul tih MNF adviser hian a sawi bawk.
Sum ruahman danah loneitute hmangaihna lam a lang zui lo – MNF
