Chakma Autonomous District Council chief executive member hlui Buddha Lila Chakma nupui Sujata Chakma chu tih luihnaa dan dikloa mi contract hna chhuhnaah court-in thiam loh a chantir a, kum 4 chhung lung in tang tur leh cheng nuai 12 chawi turin a hrem.
CADC CEM member hlui nupui Sujata Chakma hi a pasal hi CADC Session Hall sakna tura thlan contractor chu an thuneihna hmangsualin kawng hrang hranga tibuaiin chhuhsak luiah court hian a ngai a, he contractor-in hna a thawh hman atanga a sum sen leh Sujata Chakma hnena sum pek hrang hrang chhut leh paih a nih hnu ah a lo berah Rs. 34,66,585 an tichingpen hman tih court hian a sawi.
Court-a thu a kal lai mek , 2023 October 10 khan Buddha Lila Chakma hi a thi a, a nupui chauh hi a chungthu ngaihtuah zui theih a ni ta a, Prevention of Corruption Act Court special judge chuan thiam loh a chantir a, hremna hi March 18 khan a tichhuak a ni.
Thiam loh chantirna hi case chi thumah a ni a, kum 4 theuh lung in tan theihna leh cheng nuai 4 theuh chawi theih vek a ni a, sumfai chawi tur hi a pek theih loh chuan kum hnih dang lung in tana tlak ngai vek a ni bawk.
Court hian ngaihnatthiamna thuk tak pe in, a lung in tan hunchhung tur hi a kalkawp tir a, kum 4 chhung a tang ang. Sumfai chawi tur hremna erawh kalkawp tir loin a vaia belhkhaw, cheng nuai 12 a chawi a ngai a, sumfai chawi tur a neih loha lung in tana tlak dawn pawhin kalkawp tir loin kum 6 chhung a tan belh a ngai dawn a ni.
Sum tichingpentu jail tan leh sum chawi turin hrem
