Lai Autonomous District Council chief executive member nilai V Zirsanga chu sum tihchingpen leh dan loa hna lak kaihhnawihah court-in kum 4 chhung jail tang turin a hrem a. Heng thila inhnamhnawih midang pawh jail tan leh sum chawi tira hrem an ni.Cheng nuai 133 chuang tihchingpennaa inhnamhnawiha Prevention of Corruption Act Court special judge-in thiam loh a lo chantir tawh LADC CEM nilai, sum tihchingpen laia LADC executive member i/c Education (Middle School) V Zirsanga chu he thubuaia a inhnamhnawihna a len tham avangin IPC leh PC Act 1988 hnuaiah kum 4 lung in tang a, cheng nuai 4 chawi turin court hian a hrem a. Sum chawi tur a neih loh chuan kum 2 dang lung in tanin a tlak ang.
Sum tihchingpen laia Lawngtlai district education officer Lalduna Chinzah chu a pawikhawihna a rawva hle chungin, upa tawh tak, kum 82 a nih tawh avanga hremna pe nepin, IPC leh PC Act tlawhchhanin kum 4 lung in tang a, cheng nuai 6 chawi turin a hrem a. Sum chawi tur a neih loh chuan kum 3 dang lung in tanin a tlak ang.
Sum tihchingpen laia Thingkah Middle School headmaster, Lawngtlai Sub-Hqrs Middle School Teachers Association (MSTA) president NC Muankima chu a meizang hlaptu ber (prime accused) a nih avanga hremna pe na bikin, IPC leh PC Act 1988 hnuaiah kum 5 chhung lung in a tang anga, cheng nuai 6 chawi tura tih a ni. Sum chawi tur a neih loh chuan kum 3 dang lung in tanin a tlak ang.
Sum tihchingpen laia MSTA Lawngtlai secretary C Lalchawiliana chu dan bawhchhiatna thurualpuitu mai a nih avanga hremna nep zawk pe in, IPC leh PC Act hnuaiah kum 4 lung in tang a, cheng nuai 4 chawi tura tih a ni. Sum chawi tur a neih loh chuan kum 2 dang lung in tanin a tlak ang.
Zirtirtu leh thawktu dang (work education teacher) mi 30 chu an inhnamhnawihna nep deuh zawk a finfiah an nih angin, section 420 r/w 471 of IPC hnuaiah lung ina an lo tan tawh tlak tawka hrem an nih bakah cheng nuai 6 theuh chawi tur leh an sum chawi tur hi an pe thei lo a nih chuan kum 3 theuh lung in tana tlak tura hrem an ni.
Sum tichingpentu leh dan loa lakte court-in a hrem
