Daily Newspaper

Sumdawn nan hmang loa RT-PCR man tihniam turin sawrkar ngen

9

Covid-19 kai leh kai loh endiknaah private laboratory-te aia a let dawna to in Mizoram sawrkar chuan RT-PCR test man a la tih Congress Thalai chuan an sawi a. Supreme Court-in RT-PCR test-a rate sang ber a phal ang an la mek niin a sawi.

Thuthar thehdarhtute an kawmnaah Congress Thalai president Dr Lalmalsawma Nghaka chuan, India ram private laboratory hrang hranga an biaknaah an test man chu Mizoram sawrkarin RT-PCR leh Covid endikna khawl danga a ‘rate’ siam aiin a hniam hle tih a sawi a. Private lab-te hian anmahni pualin RT-PCR khawl, TrueNat khawlte leiin, an hnathawkte hlawh an tum vek laiin,
Mizoram sawrkar chu ama sum hmang mang loin tun thlengin sample endik a la kalpui zawk tih a sawi.

“ZMC-a RT-PCR khawl hi Hauva & Sons ‘donate’ a ni a, a khawl pakhat zawk hi hawhchawp a ni. Lunglei district tan MLA Pu Zodintluanga’n a MLA Fund atangin a ‘donate’ bawk. Hei bakah hian TrueNat khawl an hman hi Mizoram sawrkarin thildang test nana a lo neihsa a ni a. District hrang hranga TrueNat khawl an dah hi Chief Minister’s Relief Fund-a mi thahnemngaiten an thawhkhawm atanga lei vek a ni. Chutiang bawkin CM Relief Fund atang hian Rapid Antigen Test kit te, PPE kit lei leh, ZMC leh district hrang hrangah Covid-19 do nan leh a kaite enkawl nan hman a ni,” a ti.

Hetiang a nih lai hian Mizoram sawrkar chuan sawrkar quarantine centre-a awmte subsidized rate-in RT-PCR test-ah Rs.2500 leh TrueNat test man Rs.1500 la in, mahni thua test duh (voluntary test) ti tan RT-PCR ah Rs.4500 leh TrueNat-ah Rs.3000 an la tih Dr Lalmalsawma hian a sawi.

RT-PCR test-ah hian bawlhlo mamawh chu Virus Transport Media (VTM) leh test kit with extractor a nih thu te; private lab-te purchase rate an zawhnaah VTM hi Rs.200 velin an lei a, test kit with RNA extractor hi Rs.700 vel a ni tih a sawi.

Private lab-te tan RT-PCR pakhat test nan, sample latute PPE man tiamin, chawhrualin Rs. 1500 aiin a hniam tih a sawi a. Mizoram sawrkar chu ICMR-in RT-PCR test kit a thlawnin a rawn pek laiin, private lab-te chuan a hranpa in anmahni’-in senso tam tak – building luah man, staff hlawh man, RT-PCR khawl man, TrueNat khawl man leh a dangte an la nei zawk tih a sawi bawk.

“Heti chung hian India ram private lab. tam tak hian RT-PCR test man hi Rs.2500 aia hniam an la a. A thlawn vek deuhthawa sum dawng chungin, Mizoram sawrkar chuan RT-PCR mahnia in-test duh tan Rs. 4500 a la laksak a, private lab-te aiin Rs.2000 in a tam a ni,” a ti.

Supreme Court of India chuan India ram private lab-te chu mipui phurrit tur khawp Covid-19 test man la lo tura a lo tih tawh thu te, sawrkar damdawi in phei chu a thlawna test tura beisei an nih thu te Congress Thalai president hian sawiin, Mizoram sawrkar hian ‘testing rate’ hi ennawn leh se, a rang lama a ‘rate’ tihniam turin kan phut a ni,” a ti.
Mizorama kohhran hospital leh private hospital-ten Covid kai nia rinhlelh an neih Rapid Antigen Test an lo tih ve theihna tur ‘provision’ siam thuai turin sawrkar a ngen tih a sawi bawk.

(THE AIZAWL POST – Tualchhung)

The Aizawk Post

Full>> ePaper Subscribe

Get real time updates directly on you device, subscribe now.

Leave A Reply

Your email address will not be published.

This website uses cookies to improve your experience. We'll assume you're ok with this, but you can opt-out if you wish. Accept Read More

Privacy & Cookies Policy