Daily Newspaper

Sumdawngte bungraw singsak leh tihfai nan ni thum hawn remti

10

Aizawla sumdawngten an dawr leh bungraw dahna an singsak leh tihfaina atan Mizoram sawrkar chuan August 4-7 chhung inhawn a remti a. Hetihlai hian sumdawng ten inkharkhip burin a nghawng nasat zia lantir nan flag dum an zar chu an sumdawnna an kalpui theih rual ruala la thla turin an inhriattir.

Sumdawng pawl hrang hrang 70 chuang intelkhawmna Mizoram Business Coordination Committee (MBCC) chuan sawrkarin Aizawla kar khat dang inkharkhip a puan leh chu nitin eichawp zawngte leh kuthnathawktute tan phurrit nasa thei tur ang bera ruahmanna nia a lan avang leh, nikum atanga kumin inkarah ni 109 ngawt inkharkhip kalpui chu mipui leh rethei zawkte rahbehna nia an hriat avangin, total lockdown kalpui leh mek chu August 3 ralhmaa siamtha turin sawrkar a lo ngen tawh a. An loan ba, bill hrang hrang pek ngai leh naupang online class kalnaa senso tam tak, nitin ei leh in tur nen an tlin ta ngang lo tih entir nan leh awmze mumal nei loa sawrkarin total lockdown hmanga sumdawngte awpbeh leh a tumna chu, tuar leh theiah an ding tawh lo tih entir nan MBCC member-te chu August 2 zing atanga thu leh awm hma chuan mahni chenna hmunah te, hnathawhna hmun leh an eizawnna lirtheiahte puan dum zar vek turin an lo ti tawh a ni.

Thawhlehni khan MBCC hruaitute hi chief secretary Lalnunmawia Chuaungo chuan lengah sawmin, hrileng avanga inkhhuahkhirhna in sumdawnna a nghawng chungchang an sawiho a. Chief secretary chuan, sumdawngte chu Covid-19 leng vanga inkhuahkhirhna in a nghawng nasat ber zing ami an ni tih sawrkarin a hriatpui thu hrilhin, hri dona kawnga hmalakna hrang hrangah a thawhhlawk berte zing ami an nih thu te, task force-te leh chhungkaw khawsak harsate tanpui tura sum leh pai thawh nasa berte zing ami an ni tih sawrkarin a hriatpui thu leh an chungah sawrkar a lawm thu te a hrilh a ni.

Covid kai leh kai lo te hmuchhuak zung zung turin endik runpui pawh thui tak kalpui niin, he hna zualpui hi tunkara zawh hman beisei a nih thu chief secretary hian a sawi a. Beisei loh taka Covid-19 kai tharte kan pun belh thut a nih loh chuan inkhuahkhirhna pawh thlahdul theih a beiseiawm thu pawh a sawi a ni.

Hun rei tak dawr khar a nih avanga an sumdawnna hmun leh dawr bungruate singsak leh tihfai an ngaih thu MBCC hruaituten an thlen chu sawrkarin ngaipawimawhin, August 4-7 (Nilaini – Inrinni) chhung hian task force-te nen ruahmanna siamin an sumdawnna hmun/dawr leh bungrua singsak leh tihfai hun atan hawn phalsak a ni.

Total lockdown avanga harsatna an tawhte lantir nana flag dum tar an rawt pawh chief secretary chuan, MBCC member-ten Covid dona kawnga sum leh pai, hun leh tha an lo thawh tawhte nen a inmawi loh avangin flag dum zar lo hram turin a lo ngen a ni.

MBCC hian thuchhuah siamin, hrileng vanga an tawrhnaah Mizoram sawrkar hnena pangchang taka an ngennate sawrkarin a ngaihpawimawhnaah an lawm tih sawiin, chief secretary hoa thutkhawmah hian lirtheia eizawng te, nitin inhlawha eizawngte leh dawrkai te, industry leh lirthei hmanga eizawngte harsatna tawh a hriatthiampui an tih thu te; sumdawngte bungraw chhia leh ruahsur vanga senghawi ngai tam takte singsak fela senghawina hun pek an ni chu lawmawm an tih thu te sawiin, dawr singsa fel turten hrileng avanga sawrkar dan siamte zawm vek turin an inngen tih a sawi.

Covid 19 vanga sumdawng hrang hrangte tawrhna a nasat tawhzia entir nana MBCC-in puan dum an zar pawh pawh an sumdawnna an kalpui theih rual ruala la thla nghal vek turin MBCC member-te an inhriattir tih a sawi bawk.

Get real time updates directly on you device, subscribe now.

Leave A Reply

Your email address will not be published.

This website uses cookies to improve your experience. We'll assume you're ok with this, but you can opt-out if you wish. Accept Read More

Privacy & Cookies Policy