Sumdawnna hmun inkalpawhna tur bawhzui
Mizoram Commerce minister Dr R Lalthangliana chuan Land Ports Authority of India chairman Aditya Mishra kawmin Kawrpuichuah Integrated Check Post rang taka kalpui dan tur a sawipui a. Ministry of Home Affairs lama a lo thlen tawh thlen nawn lehin, ICP dinna atan cheng vaibelchhe 552 chu sanction a nih tur thu a lo hrilh.
Bangladesh Telemukh to Kawrpuichuah Mizoram lam inkalpawhna tur lei metre 660-a sei, cheng nuai 6400 senna tur pawh Central PWD-in tender an chhuah tawh tih Dr R Lalthangliana hi hrilh a ni a. Bangladesh lam atanga kawng siam mek vuaicha lutuk chu chak deuh zawka thawk turin a ngen.
Border trade siam puitling tur India ram hmun hrang hrang 25 chauha hmalakna awm zingah Zokhawthar leh Zorinpui tihchangtlunna tur chu Mizoram minister hian a thlen nawn a. DPR an siam nghal tur thu an lo hrilh. Hei hi Prime Minister Office pawhin thla hmasaa thlirletna an neihah an ngaihpawimawh thu sawi a ni.
MHA hnuaia Border Management secretary Dharmendra S Gangawar hmuin Mizorama border trade hmalakna chak taka kalpui turin a ngen a. Hnahthial atanga km.6 vela hla Chhimtuipui lui, Tuipui D, Hnahthial to Sangau Road lei dawh tur pawh thlen nawnin, an bawhzui tur thu a lo hrilh.
Bangladesh High Commissioner thar Md.Mustsfirzur chu Dr R Lalthangliana hian a hmu a, hmalakna kal mek Bangladesh leh Mizoram insumdawn tawnna tur chak taka hma lak a tul thu a hrilh. Union Minister of State for Education Dr Ranjan Singh hnenah Lunglei MZU Southern Campus chungchang a sawipui a. An lo bawhzui nghal tur thu hrilh a ni.
Maudarh quarry chim avanga mining lama National Green Tribunal atanga harsatna tawh thin chungchangah senior advocate Kartuala sawipuiin, Forest ministry hotu lamah hma an la nghal bawk.
Sumdawnna hmun inkalpawhna tur bawhzui
