Site icon The Aizawl Post

Super Bowl Halftime show-ah naupai chungin Rihanna a hmuhnawm

Super Bowl LVII chu an rama Pathianni zan, keini tana Thawhtanni tuk khan State Farm Stadium, Glendale, Arizona-ah Philadelphia Eagles leh Kansas City Chiefs ten an khel a, khawvela show entu ngah ber pawla an chhal thin, Super Bowl Halftime show-ah a sen suit inbelin Rihanna a rawn chhuak a, lamthiam rual, a var hlanga inthuam te nen stadium chhunga mipui pungkhawm te mit leh beng an titlai ta a ni.

Rihanna, kum 34, hi chunglam atangin stadium chhungah platform-in an khai kang nal nal a, a hla hit hrang hrang “Bitch Better Have My Money,” “Where Have You Been,” “Only Girl (In the World),” “We Found Love,” “Rude Boy,” “Work,” “Wild Thoughts,” “Pour It Up,” “All of the Lights” leh “Run This Town,” te sain, a lar chhuahna hla ‘Umbrella’ pawh a set list-ah a tel a, a tawp khat nan ‘Diamonds’ fuh zetin a thlawh tel bawk.

Rihanna hi minute 13 vel a perform a, hetih chhung hian hun awl a awm hman meuh lo a, he show-ah hian a fa pahnihna tur a pai tih pawh a thup lovin a naupai dul puar deuh al tawh pawh a tilangsar hle a ni. RiRi hian ASAP Rocky nen nikum khan an fa pakhatna an nei tawh a, tunah a pahnihna tur an pai leh mek a ni.

Rihanna hi kum nga chuang mah chu stage-ah a inlan tawh lo va, TV show-a stage lian berah rawn comeback-in a thiam a la theihnghilh loh tih a lantir a, Super Bowl halftime show-a a performance hmutu ten, ‘khawiah nge hei leh chen hi i tawm bo’ an ti rilru a nih chuan RiRi hian rimawi lam aiin a sumdawnna ‘Fenty’ huang zauhin a hmanhlel a, tunah chuan artist zinga hausa ber pawl a ni der tawh.

Rihanna hi 2019 Super Bowl Halftime Show-ah perform turin an sawm tawh a, mahse, hemi tum hian San Francisco 49ers quarterback Colin Kaepernick-a’n chi inthliarna a duh lohna a lantir danah NFL an lungawi loh avanga Kaepernick an hremna chungchangah Kaepernick a thlawp tih lantir nan an sawmna hi a hnawl a, kumin show a perform turin nikum khan an sawm nawn leh ta a ni.

Exit mobile version