Superhero zinga Hollywood Walk of Fame a arsi nei hmasa ber Batman

Superhero zinga Hollywood Walk of Fame a arsi nei hmasa ber Batman
Comic book bakah TV leh film lamah pawh character hriathlawh tak, kum 85 chhung entertainment khawvela bu chhep tawh, superhero Batman chuan history siamin Hollywood Walk of Fame-ah ama pualin arsi a nei ve dawn ta a, superhero zinga he walk of fame-a arsi nei thei hmasa ber a ni ang. Batman puala arsi hi September ni 26-ah an hawng dawn a ni.
Hollywood Walk of Fame producer Ana Martinez chuan, “Hollywood Chamber of Commerce-in Hollywood Walk of Fame-a kan superhero kan chawimawi hmasak ber tur hi kan chhuang viau a ni! Batman ngei mai chu! Khawvel hmun hrang hranga fan-ten Batman pual arsi hi television lama Batman lem changtu, Adam West leh Batman co-creator Bob Kane te kiangah a awm dawn tih inhriat chuan in phur ve ngei ang le,” a ti.
Batman hi Bob Kane leh Bill Finger ten DC Comics tana an duan chhuah niin, 1939 khan a vawi khat nan Detective Comics #27-ah Batman hi a lang a. 1966-ah Adam West leh Burt Ward te channa Batman TV series ABC-in an tichhuak a, Burt Ward hi Robin lemah a chang. He series atana theme song chu Neal Hefti phuah niin, Grammy a dawn phah nghe nghe a ni.
1989-ah Batman movie hmasa ber an tichhuak a, Michael Keaton chu Batman lemah a chang a, Tim Burton direct a ni. He film tana ‘The Batman Theme’ avangin a score album producer leh composer Danny Elfman chuan Grammy Award-ah best instrumental composition a dawng bawk. He film behchhan hian Price pawhin album tichhuakin, a hla Batdance chu Billboard Hot 100-ah kar ruk chhung a No.1 thei bawk.
1995-a Batman Forever soundtrack pawhin Billboard 200 (albums) chart-ah No.5 a kai a, he album-a hla ‘Kiss From a Rose’ avangin Seal cuan Grammy-ah record of the year leh song of the year a dawn phah bawk. 1997-a Batman & Robin soundtrack pawhin chart No.5 a kai a, 2008-a The Dark Knight leh 2012-a The Dark Knigt Rises bakah Batman v Superman: Dawn of Justice soundtrack te pawh chart top 20-ah an lang thei vek a ni.
Batman film franchise hian khawvel huapin cinema hall ticket hralhna atanga an sum lak luh zawng zawng chu dollar tluklehdingawn 6.8 a tling a, film franchise-a sum la lut tam 10-na a ni pha bawk.