MNF Thalai chuan Supply minister-in a insawifiahnaah an hriat duh engmah a sawifiah lo tih sawiin, zawhna paruk an zawt. A sawifiah thei lo a nih chuan bang ngam turin an phut tih an sawi.
MNF Thalai Hqrs. thuchhuak chuan, Phuldungsei khuaa ration card paihsak tak mi 85 chu Mizoram RCMS (Ration Card Management System) ah an ration card hi Aadhaar card nen online-a thlunzawmin dahngheh (verified & approved) an ni tih a hria em tih a zawt a. Heng mite ration card hi Mizoramah online-a Aadhaar nen thlunzawm a nih hnuah Tripura sawrkar RCMS-ah online-in an adhaar card nen thlunzawm ve theih a ni tawh loh tih a hria em tih an zawt.
‘Supply minister hian heng mi 85 ration card hi 2024 April & May leh July ah a department ngeiin ration card neitute hriat miah lohin Mizoram ration card atangin an paih (delete) tih a hria em,’ a ti a. Supply department-in a paih tak avang hian Tripura RCMS-ah an awmnghet si tih sawiin, Mizoramin online-in ration card a pe thei tawh lo zawk tih a hria em tih a zawt bawk.
‘Supply minister i nih hmaa MNF sawrkarin Mizoram RCMS-ah an ration card leh aadhaar a zawmsak a; verified & approved vek an ni chunga ration card paihsak an ni hi dik i ti em’ MNF Thalai hian an ti a. Hun hmasaa Mizorama sawrkarna changtu – Congress, PC, MNF sawrkar ten fimkhur takin Phuldungsei leh ami chengte an enkawl thin tih sawiin, sawrkar hmasaten Mizorama an ration card an lo dahngheh tawh sa chu eng rilru pu in nge ZPM sawrkarin a paihsak tak tih an zawt a ni.
Ramria awm Phuldungsei khuaa Mizo chengte chu Tripura sawrkarin hmakhawsang atangin a ta neih thiamin ration card leh electoral roll-ah a dah a; a paih duh reng reng loh laia Mizoram sawrkarin a paihsak mai chu a pawi thui hle tih a sawi a ni.
Supply minister hnenah zawhna paruk an zawt
