Supreme Court chuan April 23 khan Patanjali Ayuved, yoga guru Baba Ramdev din te chu an herbal drugs te newspaper a lian leh man to tak taka front page a advertisement an tih anga lianin ngaihdam dilna tichhuak turin thupek a pe.
Patanjali Ramdev leh a thawhpui Acharya Balkrishna te chu an ayurvedic product te mipui kaihruaisual thei zawnga court thupek kalha advertsisement an tihah court zahlohna thubuai an nei mek a ni.
Nikum November thlaa Supreme Court thupek pawh advertisment chungchangah engahmah an ngai lo va. Court chuan an thiltiha pawi an tihna leh inchhirna affidavits siamah pawh a lungawi rih chuang lo.
Hearing neih hmasakah khan contemnors pathum te chuan ngaihdam dilin media kaltlangin ngaihdam dilna an tihchhuah tur thu an sawi hlawm a.
Bench of Justices HIma Kohli leh Ahsanuddin Amanullah te hmaah senior advcate Mukul Rohatgi chuan ngaihdam dilna chu newspaper 67 ah tihchhuah niin nuai tel tak meuh meuh sen a ni tiin a sawi a.
“Mahse, in ngaihdam dilna chu newspaper a in advertisement tihchhuah tiata lian a ni em? Front-page advertisment in tih nan nuai sawm tel tak meuh meuh in hmang a ni lawm ni?” tiin Justice Kohli chuan Rohatgi chu a zawt let thung a. Bench chuan mipuite hnena ngaihdam dilna kehthem an hmu duh lo a ti a.
“Newspaper original copy kan hmu duh a. Eng page ah nge advertisement chu tihchhuah a nih etc. Kan hmu duh a ni” tiin Justice Amanullah chuan senior lawyer chu a hrilh bawk.
Bench chuan Rohatgi chu April 30 thleng advertisment original paper thehluhna hun a pe bawk a.
Court chuan Centre pawh advertisment mipui hruaisual thei chungchangah investigation leh company te hremna lekkawhna kawngah hmai hnih neiah a puh bawk a.
Court chuan AYUSH Ministry pawh Drugs and Cosmetics Rules, 1945 hnuaia advertisment mi hruaisual thei laka hremna lekkawh theihna Rules 170 chu eng vanga telhlo thut nge an nih sawifiah turin a ti bawk.
Court chuan sorkar mithiam te ngei expert body ten Rule 170 chu an siam leh rawt niin Centre chuan a hnuah chu regulation chu a nuaibo ringawt a ti bawk a.
“In Minister of State ngeiin Parliament ah consumer te humhimna atulna sawiin advertisement mi hruaisual theiah hremna lekkawh a ni ang a ti a. Tichung chuan Rule 170 chu in nuaibo a ni. Eng vanga ti nge innih?” tiin Justice Kohli chuan Centre chu insawifiah turin a ti a.
Rule 170 nuaibo chu Patanjali te ngei chuan advertisement tihna behchhan nana an hman a ni zui bawk a. Rule 170 lo zawng Drugs and Magic Remedies Act of 1954 hnuaia mihruaisual thei advertisement kaihhnawih te chu dan hlui lutuk hmantlak tawh lo a ni tih an hria a ni.
Justice Kohli chuan Patanjali te advertisement chuan mipui nawlpui leh chhungkua tam tak te chu an hriselna khawih turin a kawhhmuh tlat a ni a ti bawk a. Nausen leh school naupang te hriselna pawh khawih a ni ti bawkin judge chuan Fast Moving Consumer Goods (FMCG) company te chu chuti lam hawi chuan an kal mek a ti bawk a.
“FMCGs te hi chinchhiah an ni tawh em? Baby product mihruai sual thei advertisement te a awm a ni. Heng te hi Union government mawhphurhna a ni a. Nausen leh naupang te thlurbing bik advertisement te a awm a nih chuan Union government in a enfiah chu a mawhphurhna a ni” tiin Justice Kohli chuan a sawi bawk.
Justice Kohli chuan tun hnai kum hnih chhungin Advertising Standards Council of India chuan AYUSH Ministry te advertisement tihchhuah 948 lai chu thalo tia chhinchhiah a nei a ni a ti bwk a.
“Eng nge chungah te chuan hmalakna in neih?” tiin judge chuan zawhna a siam bawk a. Court chuan a huam tizauin Ministries of Consumer Affairs leh Information and Broadcasting te chu case ah a hnuklut zui bawk a.
“Channel pakhatin he hearing news hi an tihchhuah mek laiin screen ah vek heng company te advertisement hi tihchhuahin a awm tel mek bawk” tiin Justice Amanullah chuan a sawi bawk a.
Court chuan AYUSH hnuaia licensing authority leh drug controller te chu a dem bawk a. Bench chuan Patanjali te khingtu Indian Medical Association te ngei pawh a zuah chuang lo.
Court chuan damdawi in enkawlna bill sang lutuk leh doctor tena pharmaceutical company te nena tangkawpa medicne brands sang uchuaka an chawh thinna pawh a enfiah tur thu sawiin he mi chungchang bik hi May 7 ah ngaihtuah a ni ang a ti bawk.
Supreme Court-in Baba Ramdev te zilh zui zel
![](https://theaizawlpost.org/wp-content/uploads/Clipboard01-695.jpg)