Patanjali Ayurvedic co-founder Baba Ramdev leh company’s top executive, Acharya Balakrishna leh sorkar laipui chu Thawhlehni khan advertisement mi hruai sual thei modern medicine leh medical practitioner te hnualsuatna siam chungchang ngaihtuahnaah Supreme Court chuan a zilh.
Ramdev leh Balakrishna te chu court in affidavit a duh ang ni lova an siam avangin a hau hrep a, court chuan sorkar laipui pawh Patanjali ten Covid-10 virus lakah Western medicine ten himna an pe lo tia an aupui laia eng vanga ngawih chuh tlat nge a nih tiin zawhna a siam bawk.
Bench of Justice Hima Kohli leh Justice Ahsanuddin Amanullah te chuan Ministry of AYUSH chu eng vangin nge Patanjali ten tunlai damdawi te hmuhhniamna adver an phochhuah laia chetla miah lo nge an nih a ti bawk a.
“AYUSH ah zawhna kan nei. Covid kha 2022 lai a ni a sorkar laipui chuan ayurvedic medicines te chu a tha berah vaccine puitu mai a ni a ti a. Mahse, chu chu tihchhuahin a awm lo, mipui hriatah inpholang reng reng lo, khatih lai kha hun pawimawh lai ber asin” tiin Justice Kohli chuan a sawi a.
Tun hi thla thum chhunga Apex Court in Sorkar laipui a hauh tum hnihna a ni tawh a. February thla khan Supreme Court chuan sorkar chu maimitchhingah puhin advertisement dik lo leh mi hruaisual theite laka chetla vat turin a lo ti tawh a ni. Court chuan sorkar laipi chu medical ads mi hruaisual theite a awm loh nana hmala turin a ti zui.
Court chuan Ramdev leh Balakrishna tena adver chungchanga ngaihdam an dilna affidavit duhdah taka an siam avangin a hau bawk a. Court chu thinrim hle-in affidavit chu ‘pawmtlakloh’ ti hialin Patanjali Ayurved chu dawta chhechhamah puh theih an ni a ti bawk a.
“Ngunthluk leh uluk takin inti turah kan ngai a. Keini pawhin in ngaihdam dilna kan pawm loh avangin pawi kan ti, tawngkaa sawi satliah mai a ni” tiin court chuan a sawi bawk.
Court chuan Patanjali chuan a landanah nikum khan ads mi hruai sual thei a thehdarh a ti a. Company media unit tena court order an hre miah lo tia an tanna chu a hnawlsak bawk.
“Ram pumah court in thupek a chhuah tawh chu zah tur a ni. Hei hi court thu zahlohna dik tak a ni” tiin bench of Justice hima Kohli chuan Patanjali Ayurved lawyer in ngaihdam dilna a siam chu a chhang a.
“Court thupek tin in zawm a ngai a, kawng tinrengin in bawhchhia a ni” tiin lawmlo tak court chuan Ramdev leh Kalakrishna te chu a hrilh bawk.
Court tawngkam khauh tak chu chhang letin Solicitor-General Tushar Mehta chuan ‘thil thleng thawh kha thleng hauh lo tur a ni mawle’ a ti a, “khatiang affidavit kha siam hauh lo tur a ni” a ti bawk a. Mahse, centre chuan tanlam a nei thiang lo a ti zui bawk a.
“I remtih a nih chuan leh phalna min pe a nih chuan Patanjali counsel bia in eng nge kan siamthat theih kan ngaihtuah thei” tiin ngenna a siam chu Court chuan ‘Thutlukna kan la siam ang’ tiin a chhang thung.
Ramdev leh Balakrishnan te chu ‘hun remchang tum khat’ pek leh niin karkhat chhungin affidavit mumal takin an thehlut tawh tur a ni a. April 10 a ngaihtuah a nihnaah pawh an inlan ngei a ngai dawn bawk.
Supreme Court chuan Patanjali Ayurved tena an product leh medical efficacy chungchangah dawt hmangin advertisement an ti tia khinna a ngaihtuah mek a. February 27 khan court chuan Patanjali te chu electronic leh print ads tinte la thla vek turin a lo ti tawh a.
He thubuai hian Indian Medical Association tena Baba Ramdev an Covid vaccination drive leh modern medicine tihming hliau zawngin campaign a kalpui tia an khinna kalzel a ni.
Supreme Court in Centre, Ramdev te zilhhau
