Association of Surgeons of Mizoram annual conference vawithumna chu Inrinni khan Aizawlah hman a ni.
He hun hmanpuitu Health & Family Welfare minister Dr R Lalthangliana chuan Cancer Super Speciality Hospital chu JICA puihnaa sak tan a nih tur thu a sawi a. Sub Centre-te tih changtlun chhoh zel niin, health clinic pawh Mizorama thingtlang khaw hrang hrangah 200 chuang health worker-te enkawlna hnuaia din a nih tawh tu a sawi bawk.
Tunhnaia Mizo doctor super specialist an awm ta nual chu lawmawm a tih thu a sawi a. Cancer surgery superspecialist zo thar Lalchhandami Colney chu a lawmpui thu sawiin, doctor kalkhawmte chu zirna leh thiamna sang zawk hmu turin a fuih.
3rd Annual Conference-ah hian Dr R Tlangkunga hriatrengna pual – oration buatsaih niin, hei hi Mizorama oration hman hmasak ber a ni. Indian Journal of Surgery editor in chief Prof Sandeep Kumar chu speaker-a hman niin ‘My tryst with benign breast disease’ tih thupui hmangin thu a sawi a ni.
Association of Surgeons of Mizoram hi kum 2018-a din a ni a, tunah hian member 41 awmin heng zinga 4 hi hmeichhe surgeon an ni. He Association hian tunhnai kum hnih kalta chhung khan Lungleiah free surgical camp vawikhat buatsaih tawhin ZMC-ah free surgical oncology camp an buatsaih tawh bawk.
Surgeon-ten conference hmang
![](https://theaizawlpost.org/wp-content/uploads/2023/03/sug.jpg)