Daily Newspaper

Sushant Singh Rajput kha stun gun hmanga thah ni a sawi a awm; NIA chhui an ngiat

37

Bollywood star Sushant Singh Rajput thihna chuan nitin mai thuthar neiin, rin loh lamah a inher leh thut thin a, tunah chuan he tlangval kum 34 mi, mahni intihlum ni a sawi hi, stun gun hmanga thah niawmin sawi a awm leh ta a ni. Stun gun chu electric shock na tak pechhuak thei, mi che thei lo a siam theihna hmanrua ti mai teh ang.

SSR hi June ni 14 khan Bandra, Mumbai-a a chenna-a a mut pindanah inawkhlum a hmuh a, Mumbai police te chuan a thihnaah hian midang kut tuar a nih theihna awm hnuhma an hmu lo a, autopsy report-ah pawh inawkhlum tih niin, police ten mahni intihlum an ti bawk a ni. Mahse, a fans leh a chhungte lamin mahni intihlum duh tur khawpa a nun tihrehawmtu an awm a ni, tiin chhui an ngiat a, a case kal zelah Bihar leh Maharastra police te inkar pawh a chhe hman viau a, chumi hnuah sorkar laipuiin SSR case hi CBI chhui turin a ti ta a ni.

SSR hi stun gun hmanga thah a nih theihna theory vawrh chhuaktu chu USA-a internal medicine doctor Raju Wadhwa a ni. Wadhwa chuan SSR thihnaah hian stun gun hman ni ngeia a ngaih thu a sawi a, SSR nghawng veilama kâng (burn) ang tak hmuh tur awm chu stun gun hmanna hnuhma ni ngeia a lan thu a sawi a ni. Stun gun hmangin SSR hi che thei loin an siam a, chumi hnuah inawkhlum angin an lan tir ta niawm an sawi a ni.

Hemi chungchangah hian Rajya Sabha MP Subramanian Swamy chuan he case hi CBI bakah National Investigation Agency (NIA) ten chhui dun se a tih thu a sawi a, silai chu khawi atanga lakluh nge tih atanga chhui a ngai tiin, “A chhuinaah NIA an tel ve a pawimawh tawh a ni,” a ti.

Hetiang karah hian Enforcement Directorate chuan SSR ngaihzawng thihsan tak Rhea Chakraborty chu SSR sum tihchenpena puhnaah an la chhui zel a, Rhea leh a pa leh a u te mobile phone, laptop, tablet leh an gadgets dang te an man sak tawh a, June ni 14-a SSR chenna in a hnathawktu awm Neeraj leh Deepak Sawant te pawh ED-in thu zawhfiah atan an ko a, heng mipahnih te hi Rhea Chakraborty rawih an nih thu report a awm nghe nghe a ni. Anni bakah hian SSR flatmate Siddharth Pithani leh SSR manager hlui Shruti Modi te pawh ED hian thu an zawt fiah tawh bawk a ni.

(THE AIZAWL POST – Thalaite Huang)

The Aizawk Post

Full>> ePaper Subscribe

Get real time updates directly on you device, subscribe now.

Leave A Reply

Your email address will not be published.

This website uses cookies to improve your experience. We'll assume you're ok with this, but you can opt-out if you wish. Accept Read More

Privacy & Cookies Policy