Daily Newspaper

Sushant Singh thihna chhui zel, bipolar disorder a nei

17

Actor Sushant Singh Rajput chuan a thih hma thlakhat kaltaah bipolar disorder damdawi a ei tan tiin Mumbai police te chuan an sawi.

June 14 a thi ta actor thihna an chhui chianna kalzelah police te chuan Sushant Singh chuan a manager hlui June 9 a thi ta Mental illness nei Disha Salian hming pawh a google zing hle an ti bawk a, a thih hma lawkah a ma hming a google bawk tiin an sawi.

Police te chuan a mobile phone leh laptap an enfiahnaah hengte hi an hmuhchuah a nih thu sawiin Disha Salian intihhlumna chung changah amah nena inzawmna awm thei awm hlauhna a neia ngaih theih a nih thu an sawi a.

“Bipolar disorder a nei a, enkawl mek niin damdawi pawh a ei a ni. Eng vanga mahni intihlum nge tih chu kan chhui chian ber a ni,” tiin Mumbai Police chief Param Bir Singh chuan a sawi.

Social media-a theory hrang hrang ang lo takin politician hming pakhat mah an chhui chiannaah a la lang lo an ti bawk a, “Eng party atang mahin politician hming lang a awm lo,” tiin a sawi bawk.

Singh chuan Sushant Singh Rajput thihna chhui chungchangah a chhung tena a bialnu Rhea Chakraborty chu bumna kalpui a, a account atanga pawisa transfer tir leh rilru lama nghaisaa an puhna chungchang kal zel avanga Bihar leh Mumbai police te inkara inhruipawhna thleng pawh a sawi lang bawk a.

Bihar Police FIR chu Sushant Singh-a pain a fapa account atangin Rs 15 crore thawnchhuah tia a sawi behchhana kalpui a ni a. Mahse, Mumbai police te chuan hei hi a dik lo an ti thung a, “Kan chhui chiannaah a account ah Rs 18 crore a awm a, tunah Rs 4.5 crore vel a la awm mek a ni. Rhea Chakra-borty account-ah sum pakhatmah thawn a ni lo, kan la chhui chiang mek,” tiin Singh chuan a sawi bawk.

Rhea Charaborty chu Mumbai police tena mi 56 thu an zawhfiah zingah a tel a, Sushant Singh Rajput chu inhmelmakna leh film industry a neuh neuh thuk taka awm avangin intihluma siam a ni tih chu an chhui chhan bul ber a ni a. Rhea Chakraborty chuan amah puhna chu rapthlak a tih thu sawiin ‘thudik a lang chhuak mai ang’ tiin a sawi thung a.

Singh chuan Bihar police inquiry chungchang chu mak a tih thu sawiin Sushant Singh-a pa, unaunu leh makpate chu June 16-ah a thih hnu ni hnihah an kawm vek thu leh engmah rinhlelh an neih thu an sawi loh thu a sawi bawk a.

“Kawng hrang hrangin kan chhui a, hnathawh inelna, sum chungchang emaw hriselna vang te pawh kan enfiah vek a ni. A laptop leh phone kan kawl bawk a, engkim kan chhui a ni,” tiin Singh chuan a sawi bawk.

Get real time updates directly on you device, subscribe now.

Leave A Reply

Your email address will not be published.

This website uses cookies to improve your experience. We'll assume you're ok with this, but you can opt-out if you wish. Accept Read More

Privacy & Cookies Policy