Bollywood changtunu te zinga physical fitness ngaipawimawh ber pawla an sawi, exercise la peih tak mai Sushmita Sen, kum 47, chuan kar kalta khan a Instagram-ah tunhnai lawk khan heart attack a neih thu puangin, a dam chhuak leh thei hi vannei a intihzia a sawi bawk.
Sushmita Sen hian heart attack-ah a naran lo deuh, ‘na’ tak a tawk a, a main artery ‘95% blockage’ niin a sawi a, amah enkawltu doctor leh medical staff zawng zawng te chungah lawmthu a sawi a, Aarya season 3-ah pawh a hma zawng aia chak tha zawka rawn comeback leh ngei a tum thu a puang nghal bawk.
Hetihrual hian Sushmita Sen chuan lung (heart) chu enkawl that a pawimawh thu sawiin, regular taka in-checkup a tul thu a sawi a, “Kum lama naupang zawk zingah pawh mi tam takin heart attack hi an tuar chhuak lo a nia, chuvangin regular taka in-checkup a pawimawh a ni,” a ti.
Sushmita Sen physical fitness ngai pawimawh tak a ni a, exercise pawh regular taka la thin a ni, chuti chunga heart attack a nei mai chuan mi tam tak chuan exercise lakin awmzia a nei lo an tih phah mai te a hlauhthawn thu a sawi a, “|henkhat chuan gym kalin awmzia a nei lo, ani pawh engmah a nih phah chuang loh hi te pawh an inti rilru ngeiin ka ring. Mahse, chutiang tur a ni lo, ka hlawkpui hle zawk a ni. Hetiang heart attack nasa tham hi ka tawrh chhuah theih phah zawk a ni. Main artery 95% blockage a ni a, heart attack naran lo tak mai a ni. Hei hi ka exercise lo lak thin avangin ka tuar chhuak thei zawk a ni. Chu chu a hlawkna a ni tih ka chiang. Vawiinah pialral kai lova heti lama ka la awm thei hi ka vannei takzet a ni. He ka thil tawn hian keimahah hlauhna a tuh lo va, hmalam min thlir tir zawk a ni,” a ti.
Sushmita chuan hmeichhia ten heart attack lamah an hriatna an tihpun tula a hriat thu sawiin, “Hmeichhia ten heart attack hi mipa te tawh deuh bik turah kan ngai tur a ni lo. Chutih rualin tawngpawng hlauh tur a ni lo va, mahse, men kar a pawimawh. Nun bul kan tan thar leh chuan kan thil thlir dan a dang a, kan fimkhur a, chu chu exercise lak leh intihchak a pawimawh lehzual hun a ni tih kan hrethiam tawh a ni,” a ti bawk.
Sushmita Sen-in heart attack a neih hnua a dam chhuak chu vannei a intih thu a sawi
