Mizoram inthlanpui atana SVEEP (Systematic Voters’ Education and Electoral Participation) state icon-te chu Thawhtanni khan chief electoral officer (CEO) Madhup Vyas chuan a pisa-ah a kawm.
CEO chuan SVEEP state icon-te chu inthlan kaihhnawih hriat tur pawimawh leh vote thlak tura khua leh tuite zirtir leh hrilhhriat kawnga mawhphurhna hlen tura beisei an ni tih a sawi a. Mizoram chu ziak leh chhiar thiam tamna leh civil society chak tak awmna state a nih thu sawiin, “Kan zavaia tanrualna hmangin vote tlak thatna ber state kan siam thei a ni,” a ti.
Electoral roll-ah thalai vote nei thar 50751 an inziahluh thu te, thalaiten vote thlak an ngaihpawimawh ngei theih nan tan lak a tul thu te a sawi a ni.
Thutkhawmah hian vote thlak tam lam, voter turnout tisang tura hma lak ho dan tur sawi a ni a, inthlan hmasa lama vote tlak dante bihchian niin, a aia tam vote a tlak theih nan tan lak tlan a tul tih sawu a ni. Media platform hrang hrang hman tangkai a tul thu leh mipui zirtirna thahnemngai taka kalpui a pawimawh zual thu pawh sawi a ni.
SVEEP state icon zingah S Malsawmtluanga (footballer), DJ Lalvenhimi (singer), Teresa Rodingliani (IG personality), Zorinsanga Sailo (singer) leh Angelina VL Hriatpuii (media personality), Zothankimi (model), VL Hmangaihdawngkima (singer), Zorinpuii Hlawndo (TV anchor) leh Lalbuatsaiha (State PwD icon) te an ni.
SVEEP state icon-te nen inkawm
