Sweden-in Nato zawm thei dawn ta

Sweden chuan Nato a zawm theih nana mutan lian ber chu paltlang ta in Hungary parliament chuan Sweden dilna chu remtihna a pe ta a.
Nordic ram hian kum 2022 a Russia in Ukraine a run hnuah Nato ram zawm a dil nghal a ni.
Nato danah chuan member ram tin ten remtihna an pek a ngai a, Hungary chuan Sweden dilna chu remtihna pe duh lawk lovin a tikhawtlai a ni.
Mahse karkalta khan Hungary Prime Minister Viktor Orban chuan ram pahnih te chuan inremna nei ta in an inlungrual tak thu a sawi a ni. Nato danah chuan an member ramin beih a tawh chuan intanpui vek tur tih a ni bawk.
Swedish Prime Minister Ulf Kristersson chuan ‘hun chhinchhiahtlak’ tia sawiin Sweden in kum 200 chuang neutral ram a nihna a kalsanna tiin a sawi bawk a.
“Sweden hi ram tha qa ni a, mahse Nato kan zawmna chhan chu engkim kan ngaihdan leh rindan khauh zawka humhim kan tum vang a ni” tiin a sawi.
Nato Secretary Geeneral Jens Stoltenberg chuan Hungarian thutlukna chuan Nato alliance chu ‘chak leh him zawkin’ a siam a ti bawk.
Hungary Prime Minister Orban chu nationalist politician niin Russia President Vladimir Putin nena inkawmngeih tak an ni a. EU in Ukraine hnena military aid thawn a tum pawh a dang fo.
EU ram zingah Sweden chuan Hungary chu EU democratic principles ngaizamah a puh fio thin a. Hei hi chhang letin Orban thupuangtu Zoltan Kovacs chuan Sweden official te4 chu moral superiority neia inngai aq ti ve thung.
Mahse karkalta khan Orban chuan Swedish prime minister Ulf Kristersson chu mikhualin Sweden in Nato member nih a tumna chu a thlawp thu a hrilh ta a ni. Hungarian MP tena vote an thlak zuiah Sweden member nihna thlawp 188 awmin a thlawp lo 6 awmin a tlang ta a ni.
Thusawina a neihah Orban chuan ram hming lam tel chuang si lovin Nato ram thenkhatte chu thlan 21 lai Sweden dilna an tihkhawtlaiah nasa taka nawrah a puh a. “hungary hi mahni inrelbawl ram a ni a, tu ram duhdana nawr mai mai chi a ni lo va, thutlukna a siamah pawh inrawlh theihna an nei lo” tiin a sawi.
Hungary mai bakah hian Turkey chuan a tirah Sweden member nih dilna chu an dodal a, a chhan ber pawh Sweden chuan Kurdish seperatist te a thlawp tia a sawi vang a ni a, mahse, January thla khan remtihna a pe tawh thung.
Sweden leh a thenawm Finland te tun hma atanga military neutral ram tia hriat te chuan May 2022 khan Nato zawm an dil a ni.
Finland chuan nikum April thla khan a zawm fel tawh a, chuvang chuan Nato alliance in Russia ram nena inrina a neih chu a thui zual phah tawh a.
Russian President Vladimir Putin chuan kum 2022 khan Ukraine ah sipai tirlutin a tum ber tia a sawi chu Nato inzarpharh zel danna tur leh Western collectivism tihchauhna tur a ni a. Mahse, a beiseiloh takin Sweden leh Finland ten Nato an zawm takah chuan a duh loh dan ang daihin Nato ramri chu a zau ta zawk a ni.