Swedish Open hnehtu Rublev
Pathianni Swedish Open final-ah 7-6(3), 6-0-a Norwegian top seed Casper Ruud hnehin Russian Andrey Rublev chuan kumina a claycourt title pahnihna a hlawhchhuak.
Bastad khaw tournament-a a champion hma lawk kumin April thla khan kum 25 mi Rublez hian Monte Carlo lamah Masters 1000 title a lo la tawh bawk a, Sweden rama a hlawhtlinna nen a career-ah ATP title 14 a hui tling ve ta a ni.
Second seed Rublev chuan title hlawhchhuah chu englai pawha ropui reng a nih thu sawi chungin final khirh tak paltlang a nih avangin a tan a special zual tih a sawi a, chak zawk a nihna kawngah a vannei ve bawk tih a tarlang tel.
Russian world number seven Rublev laka tlawm ta world number four Ruud khan kum 2021 khan Bastad title hi hawn ve tawhin, tuntum erawh kum 24 mi hian final a paltlang zo ta lo a ni.
Swiss Open final lamah kum 28-a upa Pedro Cachin chuan a career-a a title hmasaber a sualchhuahna kawngah 3-6 6-0 7-5-in kum 35 mi Spaniard Albert Ramos-Vinolas a hneh.
Karleh Thawhtannia mipa tennis ranking thar tarchhuah huanah world number 90-na luah chunga champion Argentine Cachin hian a career ranking-a a tawnsanber hun tawngbuain world number 49-na a luah ang.
Final-a chak zo ta lo Ramos-Vinolas tan a career-a a title pangana tur a hmin zo ta lo thung a ni.
Budapest lama Hungarian Grand Prix tournament-ah Russian tleirawl kum 19 mi Maria Timofeeva chuan a career-a a title hmasaber ni turin WTA Tour main-draw lama a inlan vawikhatnaah title a hlawhchhuak nghal a, he clay-court tournament final-ah hian Ukrainian kum 29 mi Kateryna Baindl lakah Timofeeva hian 6-3 3-6 6-0 hnehna a sualchhuak.
Chinese Qinwen Zheng pawhin Palermo Open lamah a WTA title hmasaber changin, kum 20 mi hian kum 27 mi, Italy nula Jasmine Paolini lakah 6-4, 1-6, 6-1 hnehna a chang.
French veteran kum 35 mi Adrian Mannarino pawhin Newport, Rhode Island lama Hall of Fame tournament final-ah American tleirawl kum 18 mi Alex Michelsen lakah 6-2 6-4-in a chak a, a career-a a ATP Tour title pathumna a ni.
Clay-court tournament-te hi Wim-bledon khelh zawh, US hard-court khelh hma sia khelh thin a ni.
Swedish Open hnehtu Rublev
