Swift ‘Life of a Showgirl’ a No.1 leh ta
Taylor Swift album ‘The Life of a Showgirl’ chu Billboard 200 (US albums) chart-ah No.3 atangin No.1 a kai thar leh ta a, he chart-ah hian a zawn lovin kar riat a No.1 tling ta. Hetihrual hian Michael Buble Krismas album ‘Christmas’ pawh top 10-ah a rawn lang thar ve leh ta bawk.
Billboard 200 chart hi kar khat chhunga US-a album hralh tam dan atanga tehin chart ranking siam thin a ni a, album hralh zat chhut nan hian album tak tak hralhna bakah streaming atanga album hralhna tlukpui leh album-a hla a mala hralhna atanga album tlukpui te belhkhawm thin a ni.
Taylor Swift ‘The Life of a Showgirl’ hi kar khat chhungin 99,000 hralh lehin, chung zinga 53,000 chu streaming (on-demand official stream maktaduai 69,38) niin, album tak tak hralh chu 46,000 a ni a, album-a hla a mala hralhna atangin 1,000 a tling thei bawk.
Chart No.2 atangin No.4 thlengin No.1 hlui vek awmin, Morgan Wallen “I’m the Problem” chu 71,000 hralh lehin No.4 atangin No.2 a kaithar leh ta a, KPop Demon Hunters soundtrack chu 66,000 hralh lehin No.5 atangin No.3-ah a insawn thar leh a, Stray Kids ‘DO IT’ chu 64,000 hralh lehin No.1 atangin No.4-ah a tawlh ve thung.
Wicked: For Good soundtrack chu a kar hnihnaah 63,000 hralh lehin No.2 atangin No.5-ah a tawlh ve ta bawk.
Michael Buble ‘Christmas’ album, chart No.1 pawh lo ni tawh chu No.12 atangin No.6 a rawn kai thar leh ta a, he album hi 58,000 hralhin, chung zinga 48,000 chu streaming (on-demand official stream maktaduai 64.86) a ni. Michael Buble ‘Christmas’ hi 2011-a a tlangzarh tawh kha niin, December 2011 leh January 2012 chhungin kar nga chhung a No.1, heta tang hian kumtin Krismas vuak vetah chart top 10-ah a la lang ta ziah a ni.
Krismas album dang Bing Crosby ‘Ultimate Christmas’ chu 52,000 hralhin, No.16 atangin No.7 a kai thar leh a, he album ‘Ultimate Christmas’ best-of set hi 2024-a tlangzarh kha niin, chart No.3 pawh a lo kai tawh a, Crosby hian a thih hnuah he chart-a a tawnsan ber a ni. He album-ah hian Crosby Krismas hla hlui dah khawm a ni a, chung zinga chuan ‘White Christmas’ pawh a tel.
Olivia Dean ‘The Art of Loving’ chu 48,000 hralh lehin No.7 atangin No.8-ah a tawlh ve ta bawk.
Krismas album dang, Vince Guaraldi Trio, A Charlie Brown Christmas animated TV special soundtrack chu kum thum hnuah chart top 10-ah a rawn lang leh ta a, he album hi 46,000 hralh lehin No.18 atangin No.9-ah a invawrh a, January 2023 hnua he chart top 10-a a lan lehna hmasa ber a ni. A Charlie Brown Christmas soundtrack hi 1965-a tlangzarh tawh kha niin, hemi kum hian Emmy Award te pawh a dawng a, mahse, 1987-ah Billboard chart ranking neiin a lang ve chauh a, 2021 January thla tir chart-ah a vawi khat nan top 10-ah a lang ve chauh a ni.
Chart top 10 khartu chu chart No.1 hlui Tate McRae ‘So Close To What’ niin, 44,000 hralh lehin No.6 atangin No.10-ah a tawlh ve ta bawk.
Swift ‘Life of a Showgirl’ a No.1 leh ta
