Daily Newspaper

Synod-in Mizoram Christian College hawng

137

Mizoram Christian College (MCC) din thar chu Mizoram Synod Moderator Rev. R. Lalchangliana’n Thawhtanni khan Pathian hnenah hlanin a hawng.

He college-ah hian subject pasariha bul tan a ni dawn a. Subject tinah seat 30 theuh lak tura tih a nih laiin Higher & Technical Education ngenna avangin English, Mizo, Political Science, Sociology, Public Administration bikah chuan seat 40 ni tura tihpun a ni. Kumin July atang khan admission hawn tan a ni. Thawktu tur hian principal atan Rev.Dr. Lalchungnunga, minister pension chu contract-in lak a ni a; assistant professor atan subject tinah mi pahnih zel leh librarian lak an ni. Office assistant leh IV grade pahnih ve ve lak a ni bawk.

He college din a nih theih nan Synod-ah tum engemawzat ngaihtuah a lo ni tawh thin a. Kum 1995 Synod-ah Hmarchhak Presbytery atangin “Secular College Synod-in din rawh se” tih a lut a. 2001 Synod-ah a neih dan kawng zawn tha tih niin, Synod Executive Committee (SEC) in lo zirchiang se, ruahmanna Synod-ah thlen leh rawh se, tia rel a ni.

SEC hian a kawng ngaihtuahtu tur mi 10 ruatin an ruahmanna siam chu 2002 November-a SEC thutkhawmah an thlen a. SEC chuan ruahmanna chu siamthat leh belh ngai an tih avangin 2002 Synod-ah thehluh a ni ta lo. 2010 Synod-ah college din thu bawk hi Presbytery pathum – Aizawl West, Chhimphei leh Aizawl Bethel Presbytery atangin rawtna a lut leh a, SEC-in chak zawkin umzui zel rawh se, tia thuthlukna siam a ni. SEC chuan ngun taka a ngaihtuah hnuin, tun dinhmunah chuan kan tlin rih lo, tiin a rel leh a. College din thu chu dahthat a ni ta rih a ni.

2017 Synod-ah Tanhrila kohhranin ram a lo neih tawh chu tinzawn deuhin Aizawl West-I, Aizawl West-II leh Champhai North Presbytery atangin college din rawtna a lut leh a. Hemi kum Synod chuan, “Secular College din chu tha kan ti a, a hmun tur thlanfel leh bawhzui ngaite bawhzui turin SEC kutah kan dah” tiin a rel a ni.

Heta tang hian college din thu hi chak takin a kal zel a. 2018 February-a SEC thukhawm chuan Synod Officers Meeting (OM) in ruahmanna siam tur Committee lo ruat rawh se, tiin a rel. 2018 November-a SEC thukhawm chuan Tanhrila ram a neihsa bakah mimal ram lei belh nise, chu chu college din nan hman nise, tiin a rel ta a. College Governing Board chu OM-in a din nghal a; class pawh 2020-2021 session atangin tan nise tih a ni. College hmun atana ram neih tak zau zawng hi square metre 39,891 a ni.

Governing Board-in hma la chhunzawm zelin 2019 September 11 khan Mizoram sawrkarin college din phalna a pe ta a, Mizoram University lamah pawh phalna dil a ni a, 2019 December 30 khan phalna a pe ve leh a ni.

College hmun tur Tanhril ramah buatsaih a nih chhung hian class, office leh library te bun phawtna tur ngaihtuah a ni a. Synod Higher Secondary School campus-a an building hlui ruak chu cheithata hman phawt tura tihfel a ni.

Tun dinhmuna MCC-a
admission tih tawh dan
English – 40
Pol. Science – 40
Sociology – 40
Public Administration – 40
Mizo – 25
BBA – 23
B.Com – 21
Total – 229
(mipa 134 & hmeichhia 95)

(THE AIZAWL POST – Tualchhung)

The Aizawk Post

Full>> ePaper Subscribe

 

Get real time updates directly on you device, subscribe now.

Leave A Reply

Your email address will not be published.

This website uses cookies to improve your experience. We'll assume you're ok with this, but you can opt-out if you wish. Accept Read More

Privacy & Cookies Policy