Post Matric Tribal Scholarship (Schedule Tribe) atan sum awm tawh mah se, National Scholarship Portal-in an system an upgrade avangin India ram pumah zirlaite hnena sem hun a tlai phah dawn.
Mizoram Scholarship Board sawi danin, Post Matric Tribal Scholarship (ST) hi sawrkar laipui Ministry of Tribal Affairs atangin 1st installment atan cheng nuai 712.52 an dawng tawh a, hemi atana state matching share pawh Mizoram sawrkar hnen atangin nuai 79.16 dawn a ni tawh a. Sum awmsa hian diltu tlemte chauh a daih dawn avangin ministry-ah dil belh a ni a, kumdang ang lo takin, 1st instalment hman zawh hunah 2nd instalment hi pek a ni dawn chauh tih hriattir an ni.
Sum awm zatin a daih ang ang institution thenkhatah sem chhuah tum mek a nih laiin, National Scholarship Portal lamin an system an upgrade avangin disbursal system an rawn tidanglam a, NSP kaltlangin tu state mahin an semchhuak theih rih lo tih a sawi.
2022- 2023 Pre Matric Tribal Scholarship (Schedule Tribe) sum mamawh zat pawh neih vek ni tawhin, NSP atanga disbursal system hman theih a nih veleh sem a ni dawn tih a sawi bawk.
Rang taka semchhuah a nih theih nan National Scholarship Portal viltu National Informatic Centre New Delhi hnenah an harsatna thlenin hma lak mek a ni a, harsatna tawh mek hrethiam a, lo ngaichang turin scholarship la tur zirlaite ngen an ni tih a sawi.
System upgrade vangin scho’ sem hun khawtlai phah dawn
