Site icon The Aizawl Post

SZA ‘SOS’ kar ruk a No.1 ta

SZA album ‘SOS’ chu Billboard 200 (albums) chart-ah No.1 a ni a, he chart-a kar ruk a No.1-na a ni ta a, 2004-a Usher album ‘Confessions’ hnua R&B album he chart-a No.1 ni rei thei ber a la ni a, hmeichhe R&B singer-ah chuan 1995-a Mariah Carey album ‘Daydream’ hnua he chart-a kar ruk chin album No.1 pui leh thei hmasa ber a ni bawk. Tun kum 2020 hnulamah hmeichhe zaithiam he chart-a kar ruk No.1 thei album nei hi midang pahnih- Adele leh Taylor Swift chiah an la awm bawk a ni.

Billboard 200 chart hi kar khat chhunga US-a album hralh tam dan atanga tehin chart ranking siam thin a ni a, album hralh zat chhut nan hian album tak tak hralhna bakah streaming atanga album hralhna tlukpui leh album-a hla mal hralhna atanga album tlukpui te belhkhawm thin a ni.

SZA ‘SOS’ hi kar khat chhungin copy 1,19,000 an hralh leh a, chung zinga copy 1,18,000 chu streaming atanga album hralhna tlukpui (on-demand official stream maktaduai 160.1) niin, album tak tak hralh chu copy 500 awrh a ni a, album-a hla mal hralhna pawh copy 500 vel bawk a ni.

Chart top 4 hi chart No.1 hlui vek an ni a, kar kalta nen a la danglam lo bawk a, Taylor Swift ‘Midnights’ chu copy 73,000 hralh lehin No.2-ah bawk a la awm a, Metro Boomin ‘Heroes & Villians’ chu copy 56,000 hralh lehin No.3 a la ni a, Drake leh 21 Savage album intawm ‘Her Loss’ chu No.4-ah bawk a la awm.

The Weeknd compilation album ‘The Highlights’ chu copy 44,000 hralh lehin chart No.36 atangin No.5 a kai thar leh a, chart No.1 hlui Bad Bunny ‘Un Verano Sin Ti’ chu copy 43,000 hralh lehin No.5 atangin No.6-ah a tawlh a, chart No.1 hlui Morgan Wallen ‘Dangerous: The Double Album’ pawh copy 41,000 hralh lehin No.6 atangin No.7-ah a tawlh ve ta bawk.

Zach Bryan ‘American Heartbreak’ chu copy 32,000 hralh lehin No.7 atangin No.8-ah a tawlh a, chart No.1 hlui Lil Baby ‘It’s Only Me’ chu copy 29,000 hralh lehin No.8 atangin No.9-ah a tawlh a, chart No.1 hlui bawk Harry Styles ‘Harry’s House’ chu copy 24,000 hralh lehin No.10-ah a la inham tang hram hram e.

Exit mobile version