Inrinni zan khan Spanish La Liga khelh chhunzawm a ni a, champion lai Real Madrid an tlawm laia hnehna chang Atletico Madrid chu hmahruaitu thar an ni. Pathianni zanah FC Barcelona an chak a nih chuan Atletico Madrid hi pahnihnaah an tlahniam ve leh thung ang.
Hmahruaitu thar ni tura chak mamawh Real Madrid hi Real Betis hmachhawn turin Benito Villamarín-ah an lenglut. Mikhual an nihna mualah bul an ha viau mah se Antony khelhna Betis er let an tuar lova, rin loh takin tlawk zawkah an ang. Betis lakah an tlawm vangin champion lai Real Madrid hi pathumnaah an awm a ngaih phah.
An elpui lian pahnih; FC Barcelona leh Atletico Madrid te chunga awm ngei tum Real Madrid hian bul an an ha viau a, inkhel an aanga minute 10-na lekah Kylian Mbappe siamsak ha zet aangin Brahim Diaz chuan awlsam takin a pet goal a, hmahruaina goal a thun. Hma takah goal an thun vangin Real an phur a, na taka mualneitu nawrin goal pawh an thun belh zui teuh hle. Goal thun belh leh teuh viau mah se an hlawhtling zo lova, goal an chhuah ta zawk. Isco corner pet ha tak chu Johnny Cardoso chuan fuh zetin a tauh goal a, minute 34-naah an si phurh a sut. Cardoso goal thun hnu hian Betis lamin an tauh goal zui leh teuh viau a, Thibaut Courtois chuan pui zetin a lo save hman hlauh thung a, si phur em lovin chawlhlawk an hman theih phah.
Chawlhlawk hnu lamah Betis an khel ha viau a, goal an thun leh thuai. Second half tir lamah Real Madrid defender Antonio Rudiger chuan box chhungah Jesus Rodriguez a titlu a, penalty a chawi. He penalty hi Real Madrid midfielder hlui Isco chuan Courtois dan hman rual loha rangin a pet goal a, a team hlui laka Betis hmahruai letna goal a thun. Isco hian Real Madrid tan inelna hrang hrangah vawi 353 khelin goal 53 a thun a, Los Blancos hi Champions League-ah vawi nga a champion pui bakah La Liga-ah vawi thum a champion pui bawk. Sevilla lamaha loan-a a kal hnuin Real Betis hi kum 2023 khan a zawm a, a club hlui laka goal pawimawh tak a thun hi nasa lama lawm a hulh phah chuang lo thung.
Real Madrid hian an si phurh sut ngei tumin an khawh chiam mah se hun tawp thlengin goal an thun thei tawh lova, Real Betis lakah uiawm takin an tlawm zui ta a ni. Betis lakah an tlawm vangin table chung bera awm an tuma an tipuitling zo lo.
A chung berah Atletico Madrid
Champion lai Real Madrid an chak zawh loh hnuin pathumnaa awm mek Atletico Madrid chuan Riyadh Air Metropolitano-ah Athletic Club an mikhual. Real Madrid lehpela table chung ber luah thei an ni tih an hre reng a, chak ngei tumin an mualah an an khawh nasa hle. Hun rei tak chhung goal lut a awm theih loh hnuin Manchester City aanga an lak luh Julian Alvarez chuan minute 66-naah Marcos Llorente siam sak aangin goal pawimawh zet a thun a. La Liga-a Alvarez goal 10-na hmang hian hnehna hlu tak an chang a, table chung ber an luah ta a ni.
Hmahruaitu thar Atletico Madrid hian vawi 26 khel tawhin point 56 an hmu mek a, an hnuai chiaha awm FC Barcelona nen point hnihin an inthlau mek. FC Barcelona hian nizan khan an mualah Real Sociedad an hmachhawn a, an chak a nih chuan table chung berah Atletico Madrid lehpelin an kir leh thung ang.
La Liga-ah champion tuma inum boruak a hot zual
Table chung berah Atletico Madrid
