Thawhlehni khan magnitude 6.0-a nain Taiwan a sawi niin US Geological Survey chuan a sawi a, mi 27-in hliam tuarin chenna tlu awm lo mah se ceiling tla vel erawh a awm nual niin tual chhung thuneituten an sawi.
Taipei-ah chuan zanlai pelh hretah minute khat dawn a nghing niin an sawi.
USGS chuan lirnghing hi an ram chhim lama mau chinna hmun district, Yujing-a leihnuai km 12 vela thuk atanga intan niin an sawi.
Facebook-a video dah chhuahah chuan kang thelhtuten Nanxi district-a in chim kar atanga naupang pakhat tela mi pathum an chhan chhuak lai a lang a. He district-ah hian in chung zar a tla nasa hle a ni.
Hmun dangah thil tlain a delh avanga hliam tuar an awm nual a, mi pahnih chu elevator atangin chhanchhuah an ni bawk tih an sawi.
Health ministry chuan mi 27 hliam an awm thu an sawi a, Nanxi district fire brigade chuan ‘thil chhe nasa lutuk’ a awm lo niin an sawi bawk.
Taiwanese chipmaking giant TSMC chuan ram laili leh chhim lama an factory thenkhata thawktute chu an him nan an insasengtir tih an sawi.
Taiwan hi tectonic plate pahnih insutna bul maia awm a nih avangin Pacific Ring of Fire an tih bulah a awm a, USGS chuan khawvela lir a nghin duhna lai ber niin an sawi.
Lirnghing na an tawrh hnuhnung ber chu April, 2024 kha niin magnitude 7.4-a nain a sawi a, kum 25 chhunga a nat ber tum niin thuneituten an sawi.
Hemi tum hian mi 17 vel an thi a, lei a min a, Hualien chhehvelah chuan in tam tak a chhia a. Kum 1999-a magnitude 7.6-a nain a sawi hnua an tawrh nat ber a ni.
Taiwan ah Magnitude 6.0-a na lirnghing
